La seconde stagjon dal Teatri Stabil Furlan

Il Teatri Stabil Furlan (Tsf) no si è mai fermât e cumò al batie la seconde stagjon teatrâl che si davuelzarà dal mês di Otubar 2022 a chel di Març 2023 par un totâl di sîs apontaments di teatri in furlan. Diviersis lis novitâts, tacant de prime: «La cjase e reste simpri il Teatri Giovanni Da Udine, ma i spetacui a saran presentâts ancje in altris sedis de citât, taiadis su misure pai events in program: il zardin Morpurgo, il Teatri Palamostre, il Teatri Sant Zorç» nus dîs il diretôr artistic Massimo Somaglino che al continue: «L’aventure e va indevant tirant dongje il public in spazis che a facilitin la creazion dal dialic fra i atôrs e la comunitât dai spetatôrs, che si dan adun par gjoldi dal sun antîc e poetic de lenghe de int furlane». Un teatri duncje che si slargje simpri di plui, e che dilunc dal Istât al à tocjât la Cjargne, il Friûl di Mieç e chel de Basse, di ca e di là da la aghe, fintremai a Lignan, proponint spetacui di “lûc specific” come che si dîs, taiâts in funzion dai spazis di acet. “La Cjase. lagrimis di aiar e soreli”, la prime produzion, e zire benon cun tantis replichis; “Lis Pantianis e la machine dal timp”, pensât pai plui piçui, ancje. Daspò a son stadis leturis senichis, e rapresentazions di “Rosada!” – screât a Mittelfest –domandadis in altris contescj dilunc dal Atom e dal Invier.
◆ E sore dal avanzament di un teatri professionâl viert a un public larc, si prepare il licôf de seconde stagjon teatrâl dal Tsf che, pe sô posizion, al cjape a prestit lis peraulis dal regjist britanic Peter Brook: «Il teatri nol à categoriis, ma al sta daûr ae vite. Al à dome il pont di partence, e nol è nuie altri pardabon di fonde. Il teatri al è la vite».
◆ Sîs rapresentazions, cun trê leadis a Pier Paolo Pasolini tal an che al segne i siei cent de nassite, daûr di une retrospetive no scontade ma inmagante, resonade, di cjâf e sintiment.
◆ Si intitule “La Morteane” la prime, che e va in sene tal Zardin Morpurgo di Udin in Otubar, spetacul che al nas di un test pierdût dal poete di Cjasarse. Dome une part e je restade, chê dal “fantat” che al incuintre cuatri personaçs: il Diaul, L’Agnulut e il Muart, che a saran in sene cun musiche e coreografie. Une idee iluminante di Somaglino che nol à volût zontâ nuie di scrit o di dit, pluitost di fat, midiant dai sunôrs di un insiemi musicâl condusût di Mirko Cisilino, e cui moviments dai danzadôrs de compagnie Arearea.
“Se vivrò dovrò pur tornare” al è il titul dal secont spetacul, programât in Novembar tal Teatri Giovanni Da Udine cu la dramaturgjie di Lisa Moras, Carlo Tolazzi e Tarcisio Mizzau, la regjie di Massimo Somaglino, lis musichis origjinâls di Renato Miani, lis senis di Claudio Mezzelani e cun, sul palc, Carla Manzon, Alessandro Maione, Serena Di Blasio e Giulia Cosolo. Une produzion dal Tsf insiemi cu la Somsi di Pordenon. Un spetacul par furlan e talian che al vûl lâ in profonditât a investigâ l’amôr di Pasolini pe sô tiere, pe sô cjase mari, ancje ricomponint chel periodi crestôs dal autonomisim furlan di Tessitori, Marchetti, D’Aronco e dal stes Pasolini.
◆ In Dicembar invezit al torne “Rosada!”, cheste volte tal Teatri Palamostre, simpri pe regjie di Gioia Battista, cun Nicola Ciaffoni, Elsa Martin e Giulio Ragno Favero, spetacul tra recitazion e cjançon che al à tant plasût a Mittelfest.
◆ Il 2023 si vierç cun “Mâldasabida”, in Zenâr tal Teatri Sant Zorç, un percors poetic inovatîf ator di Leonardo Zanier, Federico Tavan e Novella Cantarutti, cun Aida Talliente e un grup di musiciscj: Leo Virgili, Roberto Amadeo, Marco D’Orlando e Flavio Passon. Une ricercje poetiche che e partìs dal sun di une lenghe che e je buine di jessi crude e spiçote, ma ancje dolce inte sô dimension plui intime.
◆ In Fevrâr a lâ in sene tal Teatri San Zorç al è il spetacul “Abbracciando stretta la vita”, continuazion dal prin studi “Carlo e Nadia” su Carlo Michelstaedter, artist e filosof gurizan muart suicide a 23 agns. Ancje chest secont aprofondiment su di lui al ven di une idee di Antonio Devetag, cu la dramaturgjie di Carlo Tolazzi e di Claudio De Maglio che al cure ancje la regjie. Une altre produzion dal Tsf in colaborazion cu la Civiche Academie di art dramatiche Nico Pepe di Udin.
◆ A sierâ la stagjon e je une colaborazion impuartante dal Teatri Stabil Furlan cul Teatri Stabil Sloven. Une intenzion che l’ent di produzion teatrâl furlane al à rivât cun tant impegn a meti in vore, realizant cussì une prime azion sinergjiche impuartante di cooperazion cuntune realtât impuartante e dongje dal nestri teatri. Al larà in sene in Març, simpri tal Sant Zorç, “Pticˇja farma – La fattoria degli uccelli”, di une comedie di Aristofane, in lenghe slovene cun soretitui par furlan, opare dal regjist Jaka Ivanc che al à sielzût la forme ibride de comedie musicâl cun musichis origjinâls di Davor Herceg e une compagnie di atoris e atôrs di grant nivel. Une ospitade di sintiment e di intenzions programatichis colaborativis, che e sarà ricambiade cu la trasfierte dal Teatri Stabil Furlan in Slovenie par un spetacul in marilenghe cun soretitui in sloven.
◆ Volte par volte o larìn a cognossi plui tal detai i apontaments di cheste seconde stagjon dal nestri teatri furlan. Pal moment, tantis informazions lis cjatais sul sît www.teatristabilfurlan.it e su lis pagjinis Facebook e Instagram che us conseìn di stâur daûr. Il teatri al è vite, pe nestre lenghe e pe nestre culture, e ancje par nô. ❚