La politiche e fâs lâ ator cul cjâf i bufons dal carnevâl

II bufons dal carnevâl (chei che intant des manifestazions di carnevâl a fasin satire politiche e sociâl, sflocjantsi a judiçs dai politics) aromai si sgrisulin nome ae idee di vierzi un cuotidian locâl di matine.
◆ Cun di fat, intant che par solit lis corporazions a son contentis se i politics ur dan il materiâl pal lôr program umoristic, chest an lis robis si ingredein in forme di meti sot pression ancje i creadôrs dai sketch di carnevâl plui babios.
◆ Tancj di lôr a àn scomençât a butâ jù i lôr stampons bielzà prime des ultimis tratativis di coalizion fra i Neos, la ÖVP e la SPÖ e lis dimissions dal cancelîr federâl Karl Nehammer, e cumò si cjatin a scugnî justâ almancul un tierç dai tescj. E chest cundut che si sedin abituâts ai continuis mudaments de politiche citadine di Clanfurt, che za par so cont e furnìs avonde materiâl pe satire! No par câs chescj matarans a àn di cetancj agns il senât citadin intal lôr program, che cun di fat li al sucêt simpri alc. E dut chest al mande sù ancje la tension prime dai spetacui.
◆ I disvilups politics a stan saborant un biel baticûr ancje ai bufons di Sant Vît sul Carantan, che intal lôr repertori a àn simpri un spetacul impuartant di satire politiche cun compagnament musicâl. Ma chest ultin si pues provâ dome cuant che il test al è pront e chest an i torototelis a vevin za fate la prime prove cuant che al capità il prin ribalton de coalizion dal moment, e a scugnirin tornâ a scrivi dut dal imprin.
◆ La balfuerie politiche e veve di jessi puartade sul palc di sene, ma al mancjave un protagonist: a vevin di fat bisugne di un atôr par figurâ Christian Stocker (membri dal parlament austriac e, daspò des dimissions di Nehammer, segretari nazionâl dal ÖVP). A pene che al fo cjatât, i bufons di Sant Vît a scomençarin dal biel principi a meti in ridicul lis tratativis di coalizion – in fin dai fats il numar musicâl, che al cjape dentri dîs personis sul palc, al veve di jessi pront dentri dal prin di Fevrâr, date dal prin spetacul. In altris lûcs dut chest al doveve jessi pront dentri de metât di Zenâr e fin a pôcs dîs prime si discuteve ancjemò di altris modificazions, e dut chest dopo di vê mudât il test bielzà trê voltis! Mancul problemis a son pes corporazions che a metin dentri pocje politiche intai lôr repertoris, ma – stant ae plui part – se propit de politiche nol ven nuie di bon, che a vegnin almancul argoments pe satire di carnevâl! ❚