La poesie si trasforme in musiche: Amôrs, lis poesiis di Cappello a cjapin vite tes notis di Miani

Tredis composizions poetichis vistidis di musiche, colôrs, sensazions e emozions. Al è cussì che al nas Amôrs, il progjet artistic ideât e diret dal musicist Renato Miani, su la racuelte di poesiis Amôrs (1999) cu lis lirichis dal prestigjôs artist e poete furlan Pierlugi Cappello.
Il mestri Miani, un dai compositôrs contemporanis plui impuartants, al met dongje un recital musicâl par vôs e piano, cun la colaborazion di doi zovins interpretis furlans di altissim nivel: Elsa Martin ae vôs e Matteo
Andrea al piano.
Cheste composizion e je creade di cjançons su la linie tra “sacri e profan”, ispiradis de musiche lizere e dai lieder todescs, ma ancje dal jazz e di suns ricercjâts te musiche di vuê. Come che al conte il mestri «Amôrs al rapresente une fusion di monts, siôrs di sugjestions e inricjîts de vôs cjalde e tenare di Elsa e dal sontuôs pianoforte di Matteo».
«Te poesie di Cappello o ai cjatât tante musicalitât e soference e fin dal prin moment mi è propit scatât un alc» cussì il mestri Miani nus conte cemût che al à tacât a lavorâ a chest progjet che, tal mieç di tancj altris impegnis, al à realizât in cuatri agns.
Dut al è scomençât tal 2011 cuntun progjet musicâl che chê volte lu puartà a lavorâ su trê poesiis di Cappello, che Miani al à simpri amirât e puartât grant rispiet par lui.
«Cu la musiche o vevi di creâ leams in ordin creatîf, e chest al è stât pussibil metint in sucession tocs che a reagjissin un cun chel altri par contrast o continuitât, lant a creâ leams soteranis, pûr te diversitât».
«A nivel musicâl o soi simpri stât ancorât al gno gjenar musicâl, plui classic e tradizionalist, ma in cheste gnove situazion o scugnivi cirî une forme di espression che e rivàs a fevelâ une lenghe condividude: svicinant il passât al presint, metint dongje altris formis musicâls plui contemporaniis o plui comerciâls e difondudis».  «Dut chest confrontâsi e fondisi di monts nol sarès stât pussibil cence la colaborazion cui doi zovins musiciscj, ducj i doi ecezionâi. Un ringraciament in particolâr al va soredut a Federico Rossi e ae Associazion Culturâl Colonos che mi àn sostignût par realizâ cheste opare».
Domandant al mestri cuâi che a sono stâts i tocs plui dificii di realizâ e cuâi chei che i stan plui a cûr, nus conte che ducj intun mût o in chel altri a àn lassât un segn. «Tu tu mi cjalis soriane, cun voi e Vorès podêti dî, jo, strac pavêr a son stâts i dôi tocs plui dificii di realizâ, sei a nivel formâl che di composizion musicâl par vie dai tescj particolarmentri impegnatîfs.
Il toc che plui di ducj al fâs efiet al è Mondimi me, che par volê florî, che al è ancje il toc plui curt de racuelte.
Al scoltadôr i pues someâ improvisât, parcè che o vin une part cjantade cence acompagnament, dome cun cualchi acuardi svoladi
dal piano.
Daspò, a proposit di tocs stramps, o vin O cerci l’aiar che tu spetenis cu li’ mans dulà che la musiche e zuie a sun di onomatopeis.
Chest toc di fat si rifâs ae liederistiche pal fat che e je presint une part strumentâl: il piano al realize un svolaç di notis par descrivi sensazions.
Il toc che plui di ducj mi plâs al è però l’ultin de racuelte, Come lûs che mi svee prin di buinore, svoladi e essenziâl, seguît di doi tocons luncs e elaborâts, che al à une atmosfere che di lontan e ricuarde lis armoniis dal blues, simpri di fat stemperadis.
Presentade pe prime volte te suaze di “Avostanis 2015”, la opare “Amôrs” e à za fat il zîr di mieç Friûl e e continue il so percors cun tancj progjets e concierts in program.
Il CD realizât de Associazion Culturâl Colonos di Lestize al è disponibil su richieste a Radio Spazio 103 o scrivint a info@colonos.it ❚
✒ Moira Pezzetta