LA PATRIE SOT DAL TEI. Rude e i siei zimui francês, dissendents dai emigrants

E tache ai 20 di Lui di Parteulis la gnove stagjon di incuintris intai paîs.
Par jessi inzornâts, cjalait il nestri sît e il profîl Facebook de “Patrie”
Istât dal 1998: Gilbert Ulian, sindic di Duran, paisut dal Gers, Sud-Ovest de France, al rive pe prime volte in Friûl, a Rude. Di chenti al jere partît tal 1924 so pari Oreste, a nancje doi agns, cu la famee e altris parincj e paisans, in dut 120 personis ancje di Parteulis e di Sacîl. In buine part a jerin piçui parons o colonos che a sielzerin di emigrâ parcè che a jerin socialiscj e lis scuadratis dai fassiscj ju vevin cjapâts di smicje. Si jerin sistemâts tal cjistiel di La Testère, a Pregnan, vivint par agns e agns intune “comugne” basade su la condivision e su la cooperazion, sot de vuide organizative propit di Sisto Ulian. Cui agns a deventarin citadins francês e po tancj a jentrarin te Resistence cuintri dai naziscj te seconde vuere mondiâl.
◆ Tal 1998 Gilbert, a Rude, al fo ospit di Franco Lenarduzzi, so cusin secont e vuê sindic dal paîs; in chê volte o jeri sindic jo, e Franco al jere vicesindic. Intun incuintri in Municipi e nassè la idee di un zimulament cul comun di Duran e cul vicin comun di Castin, che al veve come sindic Jöel Mignano. I Comitâts di pueste, vuidâts di Franco Lenarduzzi, Gerard Grossac e Andrè Costa dopo un an di contats a distance e un scambi di delegazions, za tal 2000 a rivarin ae firme di un Pat di zimulament jenfri il comun di Rude e i doi comuns francês. In chê ocasion 120 “gersoises” a rivarin a Rude e po dopo 120 rudês a lerin tal Gers. Ducj intes fameis, che si son scambiadis ospitalitât creant cussì leams une vore profonts.
◆ Di in chê volte a son stât ogni an incuintris, confronts e scambis cun visitis in Friûl o tal Gers e ancje cjatantsi in localitâts a “mieze strade” cu la visite a cetantis localitâts francesis e talianis. La passion dai Comitâts e à strissinât in chest biel procès no dome i sorestants, ma ancje lis associazions, i grups sportîfs, musicâi, culturâi e plui in gjenerâl la int, cu la realizazion di libris, CD, mostris di art e di fotografie.
◆ Dut chest al à strent i rapuarts e sburtât lis personis di chescj Paîs europeans diferents par storie, culture, tradizions, a cognossisi e a confrontâsi intal rispiet de lôr unicitât. A son stadis e a son ancje ocasions pai aministradôrs di capî i problemis, la organizazion e i ordenaments di chestis realtâts, par infuartî la prospetive di une Europe simpri plui unide.
◆ Nol è mai stât dismenteât il motîf di fonde dal zimulament, ven a stâi la migrazion dai furlans tal Gers e il leam che si è mantignût. Un esempli: tal 2014 la tessare “ad honorem” de ANPI e je stade consegnade a Oreste Ulian, furlan emigrât che al à combatût te Resistence Francese come “maquisard”. Il zimulament al è stât ancje stimul pai tancj dissendents des fameis furlanis par fâ nassi il “Fogolâr Furlan de Guascogne” sot de vuide di Italo Scaravetti; il sodalizi, tra i siei tancj merits, al à ancje chel di mantignî o di fâ imparâ la marilenghe.
◆ Purtrop la pandemie causade dal Covid 19 e à impedît che l’an passât si celebràs a Rude il vincjesim inovâl de firme dal pat. Ma i Comitâts, vuidâts di Jean Marc Busato e Jöel Dabiezies,  a stan za lavorant pal incuintri che o sperìn di realizâ l’an che al vignarà.❚