O pensi che une cualitât fondamentâl par ogni persone e sedi la sapience. O vin bisugne estreme ancje vuê di int savinte. No par nuie e je la prime te liste dai dons dal Spirt.
Sapience no je dome savê robis, no je un savê inteletuâl. Al è savê vivi, savê ce che al covente par vivi ben, par sielzi in maniere juste, par relazionâsi in forme sane cun se stes, cun chei altris, cu la vite, cul Signôr. Un savê che al ven prime di dut de vite, de esperience, plui che dai libris. Di fat, i savints a son ancje tra int no studiade. E, come dutis lis cualitâts e i dons dal Spirt, bisugne cirîle, coltivâle, stâ in vegle, parcè che si sta pôc a pierdile.
Te parabule des dîs fantatis e je il vueli che al permet di viodi, di iluminâ il scûr de vite, di capî in profonditât, di jentrâ te sale.
Pre Roman Michelotti
Lis dîs fantatis
Mt 25,1-13
251Il ream dai cîi al sarà compagn di dîs fantatis che a cjaparin sù i lôr ferâi e a saltarin fûr incuintri al nuviç. 2Cinc di lôr a jerin cence sintiment e cinc prudentis. 3Di fat chês cence sintiment, cuant che a cjaparin sù i lôr ferâi, no si impensarin di puartâsi daûr ancje il vueli; 4lis prudentis invezit, insiemi cui ferâi, a cjaparin sù ancje il vueli tes vasulis. 5Stant che il nuviç nol rivave mai, si lassarin cjapâ dutis de sium e si indurmidirin. 6Ma a miezegnot si sintì un berli: Ve il nuviç, lait incuintrii. 7Alore dutis chês fantatis si svearin e a sistemarin i lôr ferâi. 8Chês cence sintiment ur diserin a lis prudentis: Daitnus un sclip dal vuestri vueli, che i nestris ferâi si distudin. 9Lis prudentis ur rispuinderin: No, lafè! Che no vedin di restâ cence nô e voaltris. Lait pluitost a comprâlu di chei che lu vendin. 10Biel che chês a levin a comprâ il vueli, al rivà il nuviç e lis fantatis che a jerin prontis a jentrarin cun lui te sale de gnoce e la puarte si sierà. 11Plui in ca a rivarin ancje chês altris fantatis e a diserin: Signôr, Signôr, vierzinus! 12Ma lui ur rispuindè: Us al dîs in veretât: no us cognòs! 13Veglait duncje, parcè che no savês ni la zornade ni la ore.
