La norme di atuazion di meti in vore

Un zûc di scuadre par rivâ
ae competence regjonâl
La professore Elena D’Orlando, diretore dal dipartiment di Siencis Juridichis de Universitât dal Friûl, nus sclarìs cemût che la propueste di scuele “model Friûl” e pues pardabon deventâ realtât.
◆ Prin di dut, bisugne sclarî che i plans di intervent dai timps dal taramot e di cumò a son une vore diferents. Su la cuistion de emergjence sanitarie o vin di fâ riferiment aes diretivis dal guvier centrâl, stant che la normative si fonde su titui di competence esclusive dal Stât.
◆ Chê volte dal orcolat, il “model Friûl” al è nassût di une deleghe di funzions dal Stât ae regjon e ai ents locâi par chel che al tocje ciertis funzions aministrativis. Chest scheme, però, no si pues cjapâ e tornâ a meti in vore sic et simpliciter te nestre regjon, in dì di vuê, pal fat che la emergjence sanitarie di cumò no nus à tocjât dome nô, ma ben dut il teritori talian.
◆ Po dopo, bisugne ricuardâ che intal ambit de scuele la regjon e à competencis dome di caratar concorint, anzit, viodût che no je stade ancjemò fate buine une norme di atuazion dal Statût si cjatìn cul paradòs di jessi inmò plui indaûr des regjons ordenariis.
◆ No cate dut, e je vere che a son spazis di manovre lassâts aes regjons e ai ents locâi ancje par chel che al tocje la scuele. Par altri, culì si à di fâ un discors che nol è dome di caratar istituzionâl, ma bisugne ricuardâsi de autonomie scolastiche, par vie che lis istituzions scolastichis a àn un cjamp di autonomie garantide in maniere costituzionâl che ur permet di aprovâ regolaments che a van a integrâ lis fonts normativis statâls. Il discors di une scuele “model Friûl” al à di tignî iniment ancje chest aspiet. Nol è dome un probleme di rapuarts di caratar verticâl jenfri i nivei di guvier, duncje, ma ancje orizontâl, jenfri istituzions teritoriâls e scuelis.
◆ Par cumò, la nestre regjon e à pocjis competencis in materie di istruzion. Si podarès provâ a fâ un zûc di scuadre fra regjon e istituzions scolastichis, ma dome par chel che al tocje i spazis che a mancjin par fâ lezion o pes dotazions tecnichis che a coventin.
◆ Il Stât talian nol à mai vude chê di fâ buinis lis domandis de regjon sul cantin de autonomie, ma il guvier regjonâl di cumò al intint lâ indevant ta chest ricognossiment. Une norme pe atuazion dal statût e je pronte, parcè che i vevi lavorât parsore jo prime che mi sostituissin in comission paritetiche, però dopo no ai savût plui nuie. ❚