✽✽ Cui che al pensave che al fos dome un scherç, une campagne publicitarie studiade mâl e puartade indenant ancjemò piês, al varà di ricrodisi. Cui che al pensave che une batude, une scrite ironiche, une cjapade pal cûl e bastàs a ridicolizâ la iniziative, al varà di fâ marcje indaûr e recitâ il “mea culpa”.
Cui che ancjemò, ancje tra lis fuarcis politichis che si riclamin al autonomisim, al tignive un profîl bas, par pôre che une critiche salvadie e podès alimentâ un clime di suspiets, di denunzie de unitât regjonâl, al varà di fâ autocritiche.
✽✽ Parcè che “Io sono Friuli Venezia Giulia” no dome si è imponût, ancje a fuarce di oblics e di ricats economics, sul marcjât comerciâl, ma al à slargjât il so domini perfit ancje a nivel istituzionâl. Simpri plui dispès, di fat, al comparìs in bande dal logo istituzionâl de Regjon.
✽✽ E tancj di nô a ridi su lis maiutis e sui cjapieluts metûts a pro di telecjamare dal president Fedriga, cence inacuarzisi che dut al leve inte direzion sielzude di cui che al veve tal cjâf un fin precîs: anulâ la presince e la impuartance de componente furlane, diluintle intun contest che al esaltave invezit la centralitât, ancje visive, di chê Vignesie che e tornave a jessi il riferiment di une realtât teritoriâl politiche e economiche.
✽✽ Chel logo maledet, tant cjâr al assessôr Bini, al faseve di screepiste a ce che o stin viodint in chescj mês: il tornâ sù dal concet di “Tre Venezie”, che o pensavin si fossin estintis, che a fossin sparidis, in plui che des cuviertinis dai vecjos cuaders di scuele, ancje par muart naturâl par mancjance di lidrîs.
✽✽ Al torne a fâ la sô comparizion l’adietîf “triveneto”, inmascarât par no creâ subit contrarietât, cul tiermin Nord Est, ma la prove e je palese. Si lu pues capî de informazion, dulà che gnûfs parons lu declarin cence miezis peraulis, e i risultâts si viodin za intes redazions e intes pagjinis locâls, te economie, dulà che tocs impuartants des risorsis furlanis a vegnin glotûts di potentâts venits.
✽✽ E nissun dai sorestants nostrans al alce la vôs par oponisi, masse cjapâts a ritaiâsi un puest intai conseis di aministrazion di chês aziendis aromai predis dai fonts azionaris, o a mantignî il rûl intes associazions di categorie. Ve mo la stele comete che nus ven proponude su la capane de globalizazion e de omologazion!
✽✽ No je la nestre. Jesù nol nas pai potents di turni. ❚
