La mission di Ester: judâ la int in Ucraine

Ester Della Pietra, zovine di Çurçuvint, e je impegnade di agns intal mont dal volontariât. “Di Istât o ai tant timp libar parcè che o soi a cjase par 3 mês, stant che o fâs la mestre tes scuelis elementârs di Paulâr. Cussì, za di cualchi an, o fâs la volontarie inte Cooperative “Dinsi une man” e o puarti i disabii al mâr. In chest contest o ai cognossût pre Michele (che vuê al è il president da Cooperative), un predi che si da tant di fâ. Cuant che e je scomençade la vuere in Ucraine si è mot subit par judâ la biade int. Si è metût in contat cuntun ordin di muiniis che a àn la sede ta citât Ivano-Frankivs’k (prime citât che e je stade bombardade) e che a viodin des frutis vuarfinis. In pôc timp al à cjamât la sô machine di bens di prime necessitât e al è partît pe Ucraine. La prime volte si è fermât sul confin e lis muiniis i son ladis incuintri e a àn cjamât la lôr machine. In gracie di chestis muiniis, al è rivât a vê un contat cuntune volontarie a Leopoli che e insegne inglês intun grant orfanotrofi indulà che a son plui di 100 fruts cun problemis di salût diviers; il so om al è impegnât sul front. Cussì e je tacade la colaborazion cun chest istitût. Jo o soi lade pe prime volte tor la fin di Avost, tal an che e je començade la vuere, cun pre Michele e un pôcs di zovins; dopo l’entusiasim al è calât e il numar dai volontaris ancje. Ma a man a man che o sin lâts indevant, pre Michele al à cjatât i contats juscj e fidâts. Cuant che o lin, o fasìn tape fisse in Slovachie, lant e tornant, li di un vescul grêc catolic. Nus da la benedizion prime di partî e nus vûl viodi cuant che o tornìn, par capî cemût che e je lade. Il vescul nus à metût in contat cuntune grande associazion slovache che si clame, tradot par furlan, “La muse di ridi tant che regâl”, che e à une sede centrâl a Bratislave e une a Košice. In gracie di chest contat, ogni volte nus procurin il passepuart diplomatic. Cumò, cjatâts i contats juscj e capidis lis esigjencis, o vin tacât a lavorâ su progjets smirâts. O stin judant un orfanotrofi inte citât di Svaljava indulà che e je ancje une cliniche par fruts disabii. Achì e lavore une fisioterapiste slovache che i dediche 2 setemanis al mês fasint trataments gratuits ai fruts. In plui, cuntune altre volontarie, e va sul front – a 9 oris di machine dal istitût – par puartâ bens di prime necessitât; nô i fasin vê i bêçs, lôr a comprin dut là pal fat che dut al coste di mancul. Nus fasin vê il rindicont e a puartin la robe a int che e à decidût di restâ a cjase a pôcs kilometris dai Rus. Tornant indaûr, a puartin i fruts che a àn bisugne di fâ trataments adun cu lis lôr maris e dopo 15 dîs ju puartìn cjase. Cumò là e je une grande stanzie cun jets e 2 bagns, Un dai progjets che o vin impins al previôt di dividi cheste stanzie par creâ ambients plui piçui, in maniere di vê almancul 3 stanziutis e une furnide pai disabii. Nus àn domandât 15 mil euros. Se cualchidun al vûl contribuî, il cont corint al è chest, intestât ai “Cavalieri Delle Nubi O.d.v.”, IBAN IT09I0871512300000000726854.”
◆ Ester e je lade vie tantis voltis e ogni volte e à vivût esperiencis un grum impegnativis. Cuant che lis conte e je come la montane di un flum e no bastarès cheste pagjine par scrivi dut. “Mi displâs che nus rivin dome gnovis politichis ma de biade int nissun al fevele… La int che e je scjampade e je chê che e à bêçs e che par solit e vîf in citât. Fûr des citâts a son grandis campagnis cun chescj vilaçs piçui, cun cjasis ae buine, cun int puare che e vîf cun pôc – chest ancje prin de vuere –. O soi lade intun istitût statâl dulà che i fruts a jerin sporcs, lis feminis che a viodevin di lôr a jerin trascuradis e no vevin nuie. Frutis di 14 agns a son stadis violentadis, a tachin a bevi e a praticâ ats di autolesionisim, situazions no bielis che no vin cuissà trops detais. O ai vût ocasion di cjapâ sù tantis intervistis e di trascrivilis. Se tu vâs pes stradis, no tu cjatis nissun om parcè che, se ju viodin, ju cjapin e ju puartin vie. No ti dîs trops puescj di bloc che a son di un paîs a chel altri. Ogni volte che o torni, o cjati un gnûf cimitieri… o soi rivade a capî ce che al è daûr di une vuere.”
◆ Ancje il viaç nol è sempliç: “I vûl une dì a lâ e une par tornâ. Di gnot no si pues lâ ator par vie dal coprifuoco. Al è un strapaç. I puescj dulà che o lin a son a riscjo, la tension e je simpri plui presinte, a son viaçs che ti strachin no dome a nivel fisic, ma soredut a nivel emotîf; a son esperiencis che ti cjamin di tante robe tal ben e tal mâl. Al prin alarme che o ai sintût, il gno prin pinsîr al è stât: cuissà se o tornarai a viodi mê mari… Lis primis dôs voltis o soi rivade a cjase e dome un mês dopo o ai tacât a contâi la esperience a mê mari, ma ciertis robis lis ten inmò dome par me. Cuant che o soi a cjase, o pensi che o soi fortunade a jessi tal sigûr e lôr no… ti ven di tornâ li di lôr! Chê altre dì, cuant che al è stât il taramot, o jeri tornade di pôc e o ai scugnût vê un moment par capî che al jere ‘dome’ l’orcolat e che o jeri a cjase mê… stant là vie tu stâs in vuaite par ogni rumôr.”
◆ Jentrâ tal lôr mont e te lôr culture nol è stât facil: “Mi soi adatade a lôr – e va indenant Ester – no vuei mancjâ di rispiet. Mi soi cjatade spes a fâ lis orazions di sere cun lôr. Sul imprin no cognossevi la lôr lenghe e cui grancj o tabaiavi par inglês, ma no ducj lu san. Cui piçui si cjacare la lenghe dal cûr… cumò o stoi studiant la lôr lenghe ancje se no è propit tant facile. La tecnologjie e da une man cul tradutôr, ma chel al è il mancul.”
◆ Sierant, Ester mi dîs: “O soi convinte che la robe plui preziose che si puedi dâ, e sedi une strente. O ai dadis tantis e ricevudis inmò di plui in chescj 3 agns… ti si jemple il cûr.”
◆ Par stâ daûr aes ativitâts di Ester, si pues lâ a viodi la sô pagjine FB: https://www.facebook.com/hester.vertigo ❚