Frescje elete Miss Codelungje, la lisierte Malie e stave bronzeantsi sot dal soreli di Avost.
A no veve mai vût fastidis cui fotografs e a si ere fate imortalâ in dutis lis posis.
Su lis rivistis di mode e jere simpri piturade in prime pagjine.
Biade e contente, figotade di ducj, ce varessie volût domandâ di plui di cussì ae vite?
Une dì si inacuarzè che doi fotografs a si erin platâts daûr di dai sterps par fâi des fotografiis di scuindon in chel che jê e jere inte pissine di un famôs atôr.
Malie si jevà sù de sdraie par visâju che a no jere dibisugne di imbrois parcè che jê e jere disponibil par ducj.
Lôr alore i lerin dongje e a si meterin a fotografâle di ogni bande.
Cjapâts de foghe, cence volê, la sburtarin di chel pôc che al bastà par fâle colâ daûr cope e par un pêl a no finì inte aghe de pissine.
Dôs robustis çatis la ingramparin e a tornarin a metile su la sdraie.
Malie e sintì une vôs a dî:
“Signorine, signorine che a si svei!”
La miss e batè lis palpieris e e viodè doi voglons verts e grîs intun cuarp musculôs e statuari.
“Gracionis e che al mi scusi un moment” e disè Malie.
E alçà sù la cornete dal telefon e e visà:
“No o soi par nissun, disdetait ducj i
impegns che o ài e visait la stampe che o soi partide par une destinazion no cognossude.”
“Ce mût ti clamistu tu?” e domandà cun buinegracie.
E lui: “O soi il cont Sborf, vuestri umil sclâf pront a servîle in dut e par dut, principesse.” ❚
La lisierte vanitose
Roberto Meroi
