La lezion de Europeada: crodi tes lidrîs e je une sielte vincente

Cumò o vin la dimostrazion: cuant che i furlans si metin a lavorâ cun braùre e serietât a di un progjet che al à la sô fonde tai valôrs de identitât, il sucès nol scjampe. La scuadre di balon dal Friûl, che ae prime partecipazion e devente campione des minorancis dal continent, e fâs de nestre tiere un model di cemût che i popui cence Stât di dute la Europe a varessin di peâsi aes lôr lidrîs. In gracie dal “mister” Mauro Lizzi e dal president Daniele Puntel, che al à lotât tant che un leon par rivâ adore a meti in vore un progjet di cheste fate, il non dal Friûl al reste marcât fra chei che a contin inte “galassie” des nazions “che a àn une bandiere, ma no un esercit”, come che lis clamave Sergio Salvi.
◆ Di cheste biele storie o fevelìn intun speciâl di dôs pagjinis, ma no je la uniche biele gnove di chestis setemanis. Di fat a son pardabon tancj, cuaranteun, i sindics di gnove nomine che, dopo des ultimis elezions, a àn decidût di fâ il lôr zurament ancje in lenghe furlane. Tal 2020 o fevelavin dome di cuarantene, cumò par fortune e je cheste… cuarantine che nus pâr une buine vacine par sledrosâ il prejudizi che tancj furlans a van indenant a vê cuintri de lôr lenghe e de lôr identitât. Chescj sindics, nol impuarte di ce partît (talian, parcè che, magari cussì no, di autonomiscj no ‘nt son ni tancj ni pôcs), a àn mostrât di tignî cont de sensibilitât dai citadins e de dignitât de lôr lenghe. E nol è dome un at formâl, ma une responsabilitât pal avignî. Aministrâ e je une azion che si scuen fâ cun rispiet, e sielzi di partî cul rispiet pes modalitâts di espression de comunitât che si va a vuidâ, al è un at di civiltât.
◆ Dongje di chestis bielis storiis, a ‘nd è une altre che nus à simpri jemplât il cûr di amirazion e che no à vût un biel finâl. Nus à di fat lassâts masse adore, a 44 agns, Gianna Saccomano, une fantate furlane fuarte che te sô vite e je stade pardabon un esempli. Ancje se no viodeve, e à fat di dut par jessi indipendente cul so lavôr (in Regjon) e cu la sô espression creative. E veve slargjade cussì tant la sô sensibilitât viers la musiche e la culture deventant un riferiment dal Vididule Project, une formazion che e torne a fâ vivi i sunôrs furlans tradizionâi cu la atmosfere de Ete di Mieç. E jere “la autonomie” in persone, ma un brut mâl di chei che no perdonin al à puartade vie la sô presince fisiche, ma no la memorie de sô fuarce e libertât. Gianna, i furlans che no si rindin ti ringraciin e no ti dismentein. ❚