La lenghe furlane e da i numars

Dibatit su la ricercje sociolinguistiche che e misure trope int che e fevele e e capìs la marilenghe.
Tancj o pôcs? A son 444 mîl i oms e lis feminis che a fevelin la lenghe furlane in maniere ative, plui de metât de int residente intai Comuns dal Friûl-Vignesie Julie e dal Venit orientâl che si declarin furlanofons). Se si fevele di “competence passive”, ven a stâi di chei che a capissin la marilenghe ancje se no le fevelin, il numar al rive cuasi a 700.000 (une percentuâl di 9 personis su 10). Tal Friûl centrâl, te zone culinâr e in Cjargne la competence e je alte ma in chês altris zonis al è ce lavorâ par dâ un sburt ai furlans par che doprin la lôr lenghe e par che le trasmetin ai zovins.
◆ Chescj a son i dâts de ricercje sociolinguistiche “Tire fûr la lenghe”, davuelte tal ultin an de IRES FVG par capî e par analizâ l’ûs de lenghe furlane e di chês altris lenghis che si fevelin in Friûl. Il lavôr, sostignût de Regjon F-VJ e metût in vore cul contribût de ARLeF, al à vût un campion di 4.300 intervistis in 178 Comuns, zovantsi de colaborazion des scuelis cun 74 istitûts comprensîfs che a àn partecipât, judant a puartâ il scandai tes fameis.
◆ Ce nus disino chescj dâts? La int furlane tal comentâju si divît in “apocalitics” e “otimiscj”. Di une bande a son chei che “tant la lenghe e je daûr a murî”, e che a notin trop che la cifre si sedi sbassade intai ultins agns (la ultime ricercje dal 2014 e fevelave di passe mieç milion di furlanofons). Di chê altre o vin chei che a insistin su la presince massive de lenghe in maniere consistente te plui part dal teritori furlan e che a pensin che e sedi une part fondamentâl dal patrimoni culturâl dal Friûl.
◆ Al è pardabon dificil dâ judizis sui numars soredut parcè che lis statistichis a puedin simpri jessi cjapadis in considerazion di prospetivis diferentis. Dut câs, al è pôc ma sigûr che il sens di apartignince e di identitât furlane nol è muart: il 52% dal campion al dîs di sintîsi “une vore” furlan, e il 23% al declare di jessilu “avonde”. La int ancjemò braurose di jessi furlane e je chê che si pues viodi plui a pro dal insegnament dal furlan a scuele (che al è considerât “cetant” o avonde” impuartant dal 69% dai intervistâts). Doprâ i bêçs publics par ativitâts di supuart al furlan al pues rapresentâ un valôr pal 77%, e ancje chest element al è par sigûr rilevant.
◆ La lenghe furlane e je prevalente fra chês feveladis dai gjenitôrs dai intervistâts (51%) ma al è cetant ce fâ intes fameis dulà che dut câs il 79% al considere impuartant e positîf il fat di fevelâ plui lenghis in famee. Nol è un ostacul pal aprendiment scolastic, anzit, al rapresente un vantaç. E chest al va cuintri des fufignis che par agnorums a àn sburtadis tantis fameis a no fevelâ furlans ai fruts par pôre ce no imparassin ben il talian.
◆ Tes plateformis di messazistiche istantanie, za une persone su 4 lu dopre pai messaçs vocâi e la dimension orâl e je chê plui praticade e gjoldude: il furlan online al è plui scoltât che let o scrit ma chest al è impuartant par cognossi lis direzions di azion che chei che a fasin lis sieltis di politiche linguistiche a scuegnin meti in vore.
◆ La fonde par jemplâ di contignûts chestis azions cumò e je plui salde. Ocjo ai dâts dut câs, parcè che se no si rive adore a slargjâ numar, fuarce e modalitât dai intervents, la muart cidine dal furlan e je dome rimandade. ❚