Suntun campion di 940 students di prime superiôr a son plui di 30 lis lenghis dopradis in famee
Ai 21 di Fevrâr, inte aule magne dal liceu Marinelli di Udin, e je stade presentade la fotografie linguistiche dai students des scuelis secondaris di secont grât de provincie, inte suaze de cunvigne “Plui lenghis, plui vite”. Il scandai, metût in pîts dal grup di lavôr des scuelis di “La lavagne plurilengâl”, al cjape dentri cinc istitûts: il Marinelli e il Bearzi di Udin, il Linussio di Codroip, il Magrini Marchetti di Glemone, il Manzini di San Denêl e il Paschini Linussio di Tumieç.
Di cualchi an, di fat, il liceu Marinelli al puarte indevant chest progjet cun chê di rilevâ cualis che a sedin lis lenghis dopradis dai fantats intai diviers contescj di ducj i dîs (scuele, famee e amîs). A inizi an scolastic, duncje, ai fantats in jentrade intes scuelis ur ven consegnât un cuistionari indulà che, cun di plui, si domande ai arlêfs di prontâ une autocertificazion linguistiche par ogni lenghe presinte in regjon (talian, furlan, sloven e todesc), plui altris lenghis studiadis a scuele (francês e spagnûl) e, se al è il câs, di altris che a cognossin.
I dâts a confermin la esistence di un plurilinguisim fuart, dal moment che suntun campion di 940 students a son plui di 30 lis lenghis dopradis in famee, marcant duncje il fat che dongje des minorancis linguistichis storichis di simpri presintis (che, par altri, in cheste aree gjeografiche no son nancje cuissà ce rapresentadis), si zonte dut un univiers linguistic menât dal fenomen plui resint des migrazions. Il furlan al ten bot, cun plui dal 50% dal campion che lu dopre ducj i dîs in famee e un tierç che lu fevele cui amîs. Clare che il dât si sbasse inte scuele, indulà che, dut câs, sù par jù doi fruts su dîs lu doprin cui compagns. Al tierç puest, o cjatìn la lenghe inglese e subite dopo albanês, dialets talians, spagnûl, rumen, todesc e francês che, dongje dal ûs cuotidian a cjase, a vegnin doprâts ancje intai contats cu la classe (fale il rumen). L’ûs di chês altris lenghis, invezit, al è limitât al contest familiâr o a ambients circoscrits fûr de scuele. Interessante la percezion che i fantats a àn des lôr competencis linguistichis, indulà che la lenghe inglese e chê furlane si confermin ancjemò chês plui cognossudis, daspò di chê taliane. Se si confrontin inglês e furlan, dut câs, e salte fûr cualchi sorprese. Suntun campion di 872 students, di fat, a son dome 107 chei che a declarin di no vê une cognossince passive dal furlan (comprension orâl), cuintri a pene 11 pal inglês. I fastidis, al è clâr, a aumentin inte comprension scrite, indulà che 221 di lôr no àn nissune competence (cuintri dome 17 pal inglês). Intal fevelâlu i dâts a miorin di cualchi unitât, stant che dome 205 no rivin a frontâ un discors par furlan (e 22 par inglês). Inte produzion scrite, invezit, come che ben o savìn, la situazion e je critiche, cun 342 che a ametin di no savê nancje lis fondis de grafie e de gramatiche furlane (dome 20 pal inglês). Cun di plui, al è interessant marcâ cemût che i fantats a declarin di vê sù par jù la stesse cognossince des lenghis furlane e inglese a nivel avanzât intal lei (140 pal furlan e 123 pal inglês) e intal scrivi (81 pal furlan e 84 pal inglês). ❚
