LA INTERVISTE. Studiâts sot de Madonute

IIl grop di chei furlans chel al studià e si formà a Milan al è cetant nomenât. Baste ricuardâ par esempli cualchi element di ponte: David Maria Turoldo (1916 – 1992) e Fausto Schiavi (1928 – 1972).
Jenfri dai inzegnîrs laureâts li dal Politecnic, o cjatìn l’esponent dal autonomisim furlan e leader dal Moviment Friûl dal 1967 al 1972. Prime di lui, al passà pal stes istitût Valentino Magnani (1881 – 1969), che al fo diretôr dal consorzi Ledre Tiliment e si batè pe salvaguardie e valorizazion dal nestri patrimoni ambientâl.
Pe leterature, pari Turoldo si laureà li de Catoliche tal 1946, daspò la ordenazion dal 1940. La sô produzion e scomençà cu la fondazion de riviste «L’uomo». Fuart il so leam cun Coder e il Friûl. Ancje pre Bepo Marchet (1902 – 1966) – autonomist, anime dal sfuei «Patrie dal Friûl», sostignidôr de marilenghe tant che lenghe di comunicazion totâl – , al passà pe Catoliche, cun tesi sul «Volgâr furlan tai codiçs di Glemone dal 1300».
Indotorât in siencis agrariis li de Scuele Superiôr di agricolture di Milan tal 1923, Salvino Braidot (1899 – 1974) al à formât gjenerazions di casârs pe produzion dal Montâs, tant che Scuele di tecnologjie dal formadi dal Friûl di Sant Vît. E cul stes titul al fo ancje Domenico Feruglio (1881-1968), di Felet, che po al insegnà Chimiche a Padue. Giovanni Battista Gaspardis si laureà in veterinarie tal 1902 e al fo teoric de zootecnie.
Cesare Scalon, diretôr dal dipartiment di siencis storichis e documentariis de Universitât dal Friûl, al sta curant la publicazion dal gnûf «Liruti», un grant dizionari biografic dai Furlans. Un «Who’s who» che al à za viodût la jessude di 5 volums. Propit Scalon al studià ae Catoliche. E tal stes ambient a circulavin ancje il storic Remo Cacitti (1948), vuê docent li de Statâl (tra l’altri, al è stat un dai protagoniscj de ricostruzion di Vençon) e Ivan Cecchini (1948) di Glemone, za diretôr de Aie, la associazion taliane editôrs. «A jerin i agns Setante – al spieghe Scalon –: frecuentâ cors in chê metropoli al voleve dî jentrâ in contat cui «Grancj mestris». E cun zovins di dute Italie. La Catoliche, po dopo, e veve une fuarte conotazion ideologjiche».
Jenfri i furlans «notevui», studiâts te citât meneghine, il fisic Francesco Maria Stella (1745-1800), che in Italie al puartà lis teoriis di Lavoisier e su Udin al fasè svolâ un aerostat, un an dopo i fradis Montgolfier; i scultôrs Aurelio Mistruzzi (1880 – 1960) e Enzo Plazzotta (1921 – 1981). E in politiche, lauree li de Catoliche tal 1929, pal jurist Giuseppe Bettiol (1907 – 1982) di Çarvignan, esponent Dc e ministri de publiche istruzion tal 1953.  (Oscar Puntel)