LA INTERVISTE. Regjon: tal 2010 riforme dal guvier dal teritori de mont

La montagne furlane e je in spiete de gnove organizazion dal guvier dal teritori, che la Regjon vuidade di Renzo Tondo e à decidût di frontâ cuntune gnove leç te suaze dal riordin complessîf dai ents locâi. Tai intindiments, e je une prioritât di chest an.
La Regjon e à tacât a scancelâ lis Comunitâts montanis cul comissariament tal Lui dal 2009 te convinzion che e coventi une “gnove e realistiche delimitazion e une plui adeguade organizazion dai servizis ai citadins ufierte dai ents locâi metûts in cubie”, come che al à vût dit il president Tondo.
Ma cemût varano di metisi in cubie? Al è chest il cantin che la Regjon no à ancjemò pandût a clâr, almancul in forme uficiâl. Di fat, juste sul finî di Zenâr, l’assessôr regjonâl ae Funzion publiche, Andrea Garlatti, in ocasion de assemblee congressuâl Uncem, al meteve une daur chê altre peraulis che al jere dificil capî tal complès e soredut il progjet che i sta daûr: “La riforme dai ents e comunitâts montanis e sarà sot il segn di une union struturâl – al à dit – basade su la condivision di principis ispiradôrs e operatîfs; un contignidôr che al sedi in stât di rinfuarcî l’ufierte de mont regjonâl par garantî une conferme positive a dut il compart”. Si tratarà, al à zontât, di “predisponi une governance che e meti insieme lis necessitâts coletivis e lis esigjencis plui specifichis”, une “organizazion cun centralitât decisionâl che no prejudichi la funzion dai singui Comuns”.
Fin achì lis peraulis dal Guvier regjonâl che a an vût tant che risulte chê di meti in vuaite la mont, soredut la Cjargne, che, pûr te gjeneralitât des declarazions (ancje l’assessôr aes Autonomiis locâls, Federica Seganti fintremai cumò si è tignude sul gjeneric disint che a coventin “formis di agregazion par ridusi i coscj di gjestion e garantî servizis), e sint odôr di un guvier centralizât.
Dut il contrari di chê autonomie che di agnorums in ca e domande tant che imprest fondamentâl par tornâ cul pît a rive, cirint di fermâ il spopolâment, sostignî l’economie e mostrâ, come che al sucêt in chei altris Paîs europeans, che in mont si pues vivi.
Une mont che in regjon e rapresente il 57% dal teritori, dulà che al vîf il 15% de popolazion. Otantecuatri i comuns dal dut di mont, di chescj sîs e an plui di 5 mil abitants e 41 mancul di mil. Si capìs che, cun di plui in timps di magre, une riforme de organizazion aministrative tocje cjatâle, ma il pont al è cui che al cjape lis decision.
Muarte, e par il moment sapulide, la Provincie dal Alt Friûl, chê che su la sburte di un significatîf moviment, che al veve metût insieme competencis juridichis, economichis, istituzionâls, culturâls e sociâls, al puartà al referendum dai 21 di març dal 2004. Il referendum nol passà, par vie che la mont si è spacade: in Cjargne i “sì” a forin il 73%, i Glemonàs, i Tarvisians e i Cjanalins, però, si son tirâts indaûr.
E cumò? Cualchi sindic di mont al è rivât a vê in man un document ufiziôs de Regjon, datât ai 26 di Zenâr, e che al pararès di jessi il scheme dal dissen di leç di riordin istituzionâl. Voltiti mont! I sindics di Dartigne, Forgjarie, Bordan, Glemone, Magnan, Trasaghis, Vençon e Montenars e àn dit “no su dute la linie”, parcè che i “sindics a saressin ridots a figuris di rapresentance, cence podê decisionâl”. Balfuerie ancje in Consei comunâl a Tumieç. Il teme di fonde al è simpri chel: la pôre che, cu la scuse di sparagnâ, si centralizi il podê di decision, invezit di lassâlu simpri plui in man ae int che sul teritori e vîf e a scombat. Dilunc i prossims mês il dibatit si previôt penç.
Antonella Lanfrit