LA INTERVISTE. Nassudis te trape

La definizion le dan lôr stessis: par lôr la vite e je stade segnade fin di subit dal lavôr di papà Benito e mame Giannola: i zûcs, i studis, la famee, e simpri presints trape, lambics e, clâr, la sgnape Nonino.
Come che i ten a marcâ la lôr mame Giannola, la aziende no je un matriarcjât, ancje se Cristina, Antonella e Elisabetta a àn cjapât sù cun amôr e passion il testimoni e di cuant che a jerin frutis si son cjatadis a puartâ indevant la tradizion dai Nonino, deventant Aministradoris delegadis. Chi sot une fotografie des eredis di cheste aziende furlane, deventade un “brand glocâl”, che e à savût fâsi mondiâl cence pierdi il savôr locâl.
CRISTINA
45 agns e je maridade cun Antonio Maria Bardelli, e à trê fîs: Chiara di 24 agns, Davide di 22 agns e Francesca di 19 agns. E à lassât i studis universitaris in economie e cumierç dopo de nassite dai fruts. Cui gjenitôrs e viôt de gjestion dal acuist de trape e la distilazion seguint in particolâr la produzion dai “Monovitigni”, sgnapis e Ùe.
E je responsabile dal Marcjât Italie cuntun faturât dal 70% dal totâl de aziende, e à riorganizade la fuarce vendite puartantle a 140 agjenziis plurimandatariis e e cure lis relazions publichis in Italie e in Austrie.
ANTONELLA
42 agns e je maridade cul architet Luca Cendali, e à dôs fiis: Sofia di 11 agns e Gaia di 7 agns.
Si è indotorade a Udin in lenghis e leteraduris forestis modernis e e à perfezionât i studis a la New York University e a la Sorbonne di Parîs, dulà che si jere trasferide par plui di un an.
E viôt in prime persone dal “Premi internazionâl Nonino”. E je responsabile des relazions esternis, dal ufici stampe e dal marketing, e e viôt di diviers impuartants marcjâts forescj come la Gjermanie, la Ingletiere, la Grecie e la Cine.
La domande di Sgnape Nonino e continue a cressi e vuê e rapresente il 35% dal faturât.
In distilarie si ocupe dai procès di distilazion e fermentazion; e je daûr a viodi di specifichis ricercjis tal cjamp i colaborazion cun ricercjadôrs svuizars.
ELISABETTA
40 agns e je maridade cul gjornalist Giulio Giustiniani, e à trê fiis: Caterina di 7 agns, Beatrice e Costanza di 2 agns.
Indotorade in siencis politichis cun direzion internazionâl li de Universitâ di Padue (à perfezionât i studis a la New York University e a la Sorbonne di Parîs), e à simpri puartât indevant studi e lavôr te ativitât di famee. In aziende e cure, adun cui gjenitôrs, l’acuist des trapis e des uis.
E je responsabil aministratîf e e viôt de gjestion de aziende in particolâr dai rapuarts cul personâl. E je responsabile dal marcjât forest che paraltri al è in cressite continue, viodint in particolâr di chel de Russie, dai Stâts Unîts, dal Canadà, dal Brasîl e dal Gjapon.
Cun chei altris components de famee e viôt des relazions publichis de aziende.
Christian Romanini