LA INTERVISTE. Lis bandis a cjalin indenant

Par tancj la bande e je chê dal dopolavôr di paîs, chê che e compagne scjassose la procession e e sune, cun cualchi stonade, l’Imni di Mameli tes fiestis civîls. Une volte e jere cussì. No plui. La bande – che e à simpri vût il mert di svicinâ la int ae musiche – si è rignuvide tal timp, fin a deventâ une orchestre vere. I struments a son stâts inzornâts, massime chei a flât, e si son zontadis lis percussions. Ancje il repertori al è mudât un grum: aes marcjis e aes trascrizions di oparis si son zontadis musichis di cine e musichis origjinâls par bande, fatis di compositôrs cualificâts formâts tai Conservatoris, dulà che a stan nassint bandis di professioniscj e si pues cjapâ il diplome di Strumentazion par bande, tant che al «Tomadini» di Udin. In sumis, cui che al pense che la bande e sedi sinonim di musiche di basse cualitât al à di ricrodisi.
In Friûl-Vignesie Julie a son plui di 4 mil 500 i strumentiscj che a sunin intune bande. La plui part in provincie di Udin, li che i apassionâts di musiche di insiemi a son 2363; in chê di Pordenon a son 1036, in chê di Triest 665 e a Gurize 468. I numars, furnîts de Anbima Friûl-Vignesie Julie – la sezion regjonâl de Associazion nazionâl bandis talianis musicâls autonomis -, a dan un cuadri plui che positîf dal moviment bandistic in regjon, simpri plui vivarôs e bon di cjalâ al avignî cence pôre. I zovins, di fat, no mancjin. Sù par jù la metât dai strumentiscj e à mancul di 25 agns. Une presince che e je la risulte di un impegn plui che decenâl de Anbima Friûl-V.J. e des singulis bandis (98 in dute la regjon, 51 dome in provincie di Udin), che a àn investît un grum su lis gnovis gjenerazions. Scuasi dutis lis bandis a proponin cors di insegnament strumentâl e almancul une sessantine e à une Scuele di musiche struturade, cun professôrs cualificâts. A son almancul 3 mil i arlêfs des Scuelis di musiche in regjon, di chescj, 1830 in provincie di Udin. Ancje par lôr la Anbima regjonâl e inmanee ogni an campus estîfs di aprofondiment musicâl, li che si formin i strumentiscj de bande zovanîl regjonâl de associazion (ben plui di un centenâr). E chei plui brâfs a son judâts a cjapâ il svol tal mont de musiche in gracie dai concors internazionâi metûts sù di cualchi bande furlane: moments impuartants di confront e di cressite pai zovins musiciscj.
Di fat, vuê ae bande e je afidade la educazion musicâl dai fruts, trascurade de plui part des scuelis talianis, che, in cualchi câs, si poin propit aes bandis par meti in vore progjets musicâi. A ‘nd à fate di strade la bande, di cuant che e je nassude tal Votcent, tant che espression de fanfare militâr, e, la plui part, tai agns Vincj e Trente dal Nûfcent massime par iniziative di predis, che, in cheste maniere, a àn volût puartâ tai paîs il sens de culture e dal volontariât. Ancjemò in dì di vuê la bande e je espression di volontariât no professionistic, di personis che si cjatin par studiâ la musiche, simpri plui preparadis, a tacâ dai diretôrs, formâts tai Conservatoris e inzornâts cui cors par mestris di bande inmaneâts di agnorums ancje de Anbima regjonâl.
(ERIKA ADAMI)