La int a ’nd à avonde di rumôr e puce!

Alfin la Carinzie e à di decidi alc sul turisim. E i carinzians in chescj dîs si stan domandant: “Ce volìno nô pal nestri teritori cussì biel, cui siei lâts, lis sôs monts, i siei boscs e il so ambient ancjemò avonde crei?” Tancj di lôr a pensin cun di fat che i politics a ledin, cence ecezions, daûr des esigjencis eletorâls, ven a stâi des bramis des lobbies regjonâls. Ogni piçul sindic al pense alore di podê, pal so sucès eletorâl, spindi i bêçs dai contribuents par events sicu chel des 80.000 Harleys che si dan dongje par dôs setemanis inte aree limitade dal lât di Faak tor i prins di Setembar. Figuraitsi ce che nol è ae fin de setemane!
◆ Si trate, cun di fat, di sielzi ce che si vûl ufrî al turist: il relax di chest paisaç naturâl inmò crei o il davoi e l’incuinament acustic di une grande citât? No si pues vê il caratel plen e la massarie cjoche, e alore si à di fâ une sielte.
◆ Il probleme nol è nome chel dal rumôr e de puce di combustibii che si sintin par dîs e dîs, ma ancje chel de sigurece, stant che i bikers a pensin di podê fâ ce che a vuelin: cori pes stradis di cjamp e pai paîs cence rispietâ lis regulis dal codiç, ni chês dal rispiet di une aree rurâl, cun ducj i siei animâi, che a scaturissin intal sintî i batibuis e i sclopetons des lôr motos trucadis. Po, chei che si movin ogni dì par lavôr a àn il lôr dafâ par cori dilunc des stradis principâls, là che i motocicliscj a saltin fûr di ogni dontri, dispès cence dâ precedencis e sorpassant a drete e a çampe come che a fossin i parons de strade, e sbarlufint cussì i autiscj di passaç.
◆ Se vie pal an la Austrie e je cognossude tant che il paîs a tolerance zero cuintri dai rumôrs, in chei dîs si sopuarte dut, salacor par vie dal diu bêç, che al puarte cetant ai esercents prime di sierâ la stagjon estive. Chest nol ten cont però di ducj chei che a contribuissin al benstâ dal paîs ancje cence vê un locâl public e che vie pe gnot a varessin bisugne di polsâ. Ae fin bisugne pensâ ancje al incuinament, che in pôcs dîs al strapasse chel di une grande citât intes oris di ponte. Cuant che dut al finìs, a restin grumons di scovacis – cence diferenziament, ben clâr! – tant che marche di un event che al à lassât il rumiot ancje inta chei che a àn vuadagnât. Ma, come che a disevin i romans, pecunia non olet… nancje di gas di scaric.
◆ Bisugne fâ cumò une riflession pai aministradôrs dei nestris biei paisuts di mont, là che il turist citadin, che al varès di vignî a ricreâsi, al pretint invezit di cjatâ la movida come intal rest dal an. Ve ca alore che a nassin dapardut birariis o ostariis pusticis, che par vêr a son discobars, par contentâ i vacancîrs, che no àn rispiet par chei che a vivin dut l’an intes nestris valadis. Si dismentein che chescj a contribuissin a mantignî in vite la mont, a dispiet des cundizions climatichis e dai discomuts ambientâi che a rindin grivie la vite. Ogni lûc al varès di jessi prudelât e gjoldût, cence masse sfuarçaduris, su la fonde di ce che al ufrìs. ❚