LA FABRICHE DAI… LIBRIS – GNOVIS IN VETRINE. Sant Simonut: fruts brâfs ma pôcs

Sì… si podarès scrivi un articul normâl, su la premiazion dal Sant Simonut, davuelte a Codroip come par solit, pôc prime di chê dal premi pai “grancj”, che chest an e colave juste di domenie, inte dì che e da il non al premi e che siere la nomenade manifestazion dal Friûl di mieç.
La croniche de serade si conte in curt: premiâts i prins trê istitûts – Dael, Codroip e Faedis – cuntun atestât consegnât ai fruts presints e i bogns par cuistâ libris di leterature e culture furlane, consegnâts ai mestris. In bande di chel la leture dal judizi de zurie, che e à marcât sedi la origjinalitât dai tescj, sedi la vivarositât dal lessic, cussì come, soredut, la capacitât di doprâ il furlan par contâ de vite di ogni dì, comprendude la sô modernitât. La lenghe doprade tal Sant Simonut, insome, e je une lenghe vive, come i siei contignûts.
Ce vanzial? La sodisfazion di ducj i fruts presints, la comunicazion che si è decidût di premiâ l’Istitût, pluitost che la singule conte, e il plasê di ricognossi une vore di atenzion dal pont di viste de grafie e de forme.
Batimans, fruts contentons… e vie indenant cul rest, par tornâ a viodisi il prossim an.
Ma e je une croniche masse facile e cuiete.
La gnove plui gruesse, rispiet al premi dal an prime, e je invezit la riduzion dai istitûts che a àn partecipât, che se in percentuâl e je preocupant (mancul 50%), in numar (dome 5 partecipants) al puarte a pensâ a ce che al podarès sucedi plui indenant… Al sarà ben un parcé, se lis scuelis a decidin di no aderî al bant di concors inmaneât de Arlef? Ancje parcè che si va a cjalâ di dongie si cjate che i premiâts a son par la plui part chei Istitûts che a àn une continuitât dal insegnament de lenghe e che dentri a àn figuris di riferiment che di agnorums si dan da fâ par il furlan. E al vâl forsit zontâ come che, dispès, chest ultin fat al sedi il motîf dal prin.
Ven a stâi che no si pues sierâ cheste edizion dal Sant Simonut cence une riflession fuarte e clare su lis dificoltâts che lis scuelis a cjatin inte partecipazion. Vadial par chês economichis, che si sa, a son e a saràn, ma se si pant che il 65% dai gjenitôrs al sielç, inte primariis, l’insegnament dal furlan, e daspò, intes mediis, si rive a tirâ dongje dome cinc scuelis, al à di jessi alc di cambiâ ancje intes modalitâts organizativis, par jessi di jutori e no di ostacul a chel che al reste un dai fondaments leteraris par incressi la alfabetizazion de lenghe furlane. ■
Raffaele Serafini