LA FABRICHE DAI… LIBRIS. Ce celebrâ dal 1511: Juliete e Romeu o la rivolte popolâr?

Pai cinccent agns dal 1511 e je stade cualchi contraposizion su ce proponi in prin plan tes celebrazions: tra tantis clâfs di leture, chês dôs che a àn vût plui fuarce a son stadis, di une bande, la origjin furlane de storie di Juliete e Romeu (leade ae vicende de furlane Lucine Savorgnane e dal visentin, di mari furlane, Luigi Da Porto, che a varès ispirade la opare shakespeariane), di chê altre bande, e la grande rivolte popolâr.
Sot de contraposizion a son concezions e interès diferents su cemût invistî risorsis publichis: duncje e je ancje une cuistion politiche.
In cualchi câs si è rivâts a banalizâ la cuistion metintle sul plan “fasêt l’amôr, no stait a fâ la vuere”, in favôr de storie dai doi inamorâts. L’assessôr ae culture di Udin Reitani, invezit, al à staronzât la impuartance di Juliete e Romeu pal Friûl, cul argoment che, ancje se cheste storie e je nassude di fats furlans, in realtât la sô grandece e ven di Shakespeare e no de sô origjin.
Tornant ai aspiets di impostazion politiche, si pues resonâ ancje intune prospetive plui gjenerâl: cun ce criteri il Friûl aial di proponisi a se stes e al mont? Daûr di ce che si pense che ur puedi plasê a chei altris, o daûr di ce che il Friûl al à di sostanziâl e di origjinâl?
Cjalcjant su la furlanetât di Juliete e Romeu si doprarès la innomine di Shakespeare par vê visibilitât: a saressin ancje aspiets positîfs, ma al podarès jessi il segnâl che no si rive a viodisi cun maturitât e libertât di pinsîr e che e si calcole biel e impuartant dome ce che al è biel e impuartant par chei altris. Di fat, cence gjavâ nuie a Juliete e Romeu, al è un episodi che nol à nissun pês te storie e nissun efiet diret su la leterature dal Friûl.
Dut al contrari centrant di plui la atenzion su la rivolte popolâr dal 1511, ancje cun dutis lis tecnichis dal marketing, si propon un fat impuartant pai furlans di une volte e che al à di fâ resonâ ancje chei di vuê, un fenomen storic cognossût e studiât a nivel internazionâl e che al pues vê ancje efiets economics e turistics sul nestri teritori.
Semplificant, magari masse, o sin di gnûf devant de alternative tra provincialisim di “aparence” (Juliete e Romeu) e libertât di mostrâ la nestre “sostance” (la rivolte dal 1511).
Sandri Carrozzo