La “Declarazion Schuman” e fâs 75 agns – ALE-EFA in Assemblee

A jerin lis cuatri dopodimisdì di martars ai 9 di Mai dal 1950, cuant che il ministri pai afârs forescj dal Stât francês di in chê volte, Robert Schuman, inte Sale dal Orloi dal palaç che si cjate al numar 37 dal Quai d’Orsay, a Parîs, e che ancjemò in dì di vuê al è il sît di chel ministeri, al faseve indenant la sô idee, disvilupade in cunvigne cul so colaboradôr Jean Monnet, in cont dal inviament di un procès di integrazion politiche e economiche de Europe. Chel so intervent al è passât ae storie cul non di “Declarazion Schuman” e al ven calcolât tant che il moment fondatîf di chel percors che al à vût tant che risultât la creazion des Comunitâts europeanis e il lôr disvilup istituzionâl che di chel e je saltade fûr la Union Europeane (UE) dal dì di vuê.
◆ Par Schuman, cul intindiment di creâ lis cundizions par une «pâs sigure e continue», al coventave tornâ a fâ sù la Europe, che e jere stade devastade de Seconde Vuere Mondiâl, cul meti dongje formis di colaborazion concrete tra i Stâts in maniere di puartâ indenant chês che lui al clamave «une solidarietât di fat» e «une Europe ben organizade e vivarose», che a saressin incressudis, planc plancut, inte direzion de creazion di une «Federazion europeane». A son passâts setantecinc agns di chê volte e il procès di integrazion europeane al è lât indenant in maniere no lineâr e cuntun grum di contradizions, tacant dal fat che chê «Federazion europeane» e je ancjemò une vore lontane. Magari cussì no ancje la «pâs» e je lontane de realtât e in chest contest la Europe che o vin cumò – lis istituzions de UE – no je in stât di vê chel rûl positîf e propositîf che al varès vût di vê sei daûr de propueste di Schuman che in coerence cui resonaments fats indenant ancjemò prime, tra 1941 e 1944, de bande dai autôrs dal Manifest di Ventotene. Cheste Europe e rive dome a cjapâ posizions altitonantis e ambiguis – par esempli, tal conflit jenfri Russie e Ucraine – o ben e palese impotence o fintremai indiference, cemût che si viôt tal câs di Gaza.
◆ L’inovâl de “Declarazion Schuman”, che za di agns al ven memoreât tant che “Zornade” o ben “Fieste” de Europe, al varès di jessi la ocasion par fâ cualchi pensament in cont de storie, ma soredut de atualitât e dal avignî, e par mobilitâsi cun chê di fâ sù la Europe politiche e istituzionâl che e mancje e che e covente simpri plui.
◆ Cun chê prospetive al covente prin di dut liberâsi de scjaipe dai nazionalisims dominants, che no permetin di mudâ la situazion e che a son di ispirazion dal ategjament dai leaders “nazionâi” e “nazionaliscj” che no rivin a fâ nuie altri che jessi autoreferenziâi e in chel istès a tignî posizions di sotanance rispiet ai doi incuilins dal Cremlin e de Cjase Blancje.
◆ Di chê Europe “diferente” e “plui Europe” si à fevelât, juste tai dîs dongje de Zornade de Europe, a Naoned/Nantes. In chê citât de Bretagne, di 8 ai 10 di Mai stâts, si à davuelte la Assemblee gjenerâl de Aleance Libare Europeane (ALE-EFA), il partît politic che a nivel continentâl al ten dongje la plui part des fuarcis politichis progressistis che a son espression des regjons e des nazionalitâts. In chê ocasion a son stâts fats indenant resonaments di sest in cont de democrazie, dal autoguvier, dai dirits e de pâs.
◆ E propit par fâ indenant rivendicazions in cont dai dirits, in particolâr cun riferiment a lenghe e ae istruzion, juste vinars ai 23 di Mai a Baiona/Bayonne, tal Paîs basc dal Nord, in miârs tra students, professôrs, gjenitôrs, citadins, rapresentants di associazions e aministradôrs locâi si àn dâts dongje par denunziâ la mancjance di risorsis pes scuelis imersivis baschis Seaska di chel teritori sot dal Stât francês, là che al va dilunc a cressi il numar dai students e il guvier di Parîs nol da rispuestis di sest. ❚