La culture e fâs “Il borc di Darte plui alt”

Ai 16 di Fevrâr, ta sale consiliâr di Darte, cu la presince dal sindic Andrea Faccin e dai assessôrs Italo Di Gallo e Valentina Cozzi, dal president dal comitât frazionâl di Val e Rualp, Erick De Cillia, dal diretôr dal progjet Marco Santoro e dal president di Euroleader Michele Mizzaro, al è stât presentât il progjet “Il borc di Darte plui alt – Arta Cultura”.
◆ “Il progjet – al à dit il sindic inte dì de presentazion – al à chê di recuperâ, valorizâ e promovi il patrimoni storic e culturâl dal Comun di Darte, e in particolâr de frazion di Val e Rualp, rinfuarçant la colaborazion tra la popolazion, la aministrazion comunâl e lis ativitâts presintis tal teritori. Il progjet, che al partirà di chest mês di Fevrâr, al previôt une serie di incuintris, escursions, concierts, events teatrâi, ma ancje realizazions di oparis e infrastruturis al servizi de popolazion residente. Cun di plui, si intint valorizâ lis manifestazions tradizionâls che a son inmò vivis inte frazion. Il progjet in realtât al jere stât inviât di nô aministradôrs inte aministrazion di prime: idee nassude in gracie dal ex assessôr Stefano De Colle che al à vût une cierte intuizion e atenzion par valorizâ il teritori. Di chest progjet si è passâts ae presentazion di une domande di contribût sul bant PSR 2014-2020 – midiant di Euroleader – che e je stade cjapade in considerazion (prin puest in graduatorie) e premiade cuntun contribût economic di cirche 180.000 euros, che al darà la pussibilitât di meti in vore il progjet. Dongje dal Comun di Darte a son stât coinvolts il Comitât frazionâl di Val e Rualp e la Pro loco di Darte; tal svilup e je previodude ancje la partecipazion di altris sogjets. I intervents culturâi – al va indenant il sindic – a pontaran a rivitalizâ il borc, e lis operis infrastruturâls a coventaran par miorâ i servizis pe int che e vîf li. I progjets di chest gjenar a son impuartantons pal nestri teritori di mont: di une bande par garantî ai residents une schirie di servizis che a permetin di restâ sul puest, e di chê altre par tirâ i turiscj in chestis realtâts e par fâur preseâ dut ce che il teritori al pues proferî. Nô aministradôrs o vin une fortune grande: si cjatìn a aministrâ un teritori che al à elements di valôr sot l’aspiet paisagjistic, culturâl, gastronomic, dilà di dut ce che al è leât al compart termâl. O stimìn che cun progjets di cheste fate a puedin jessi valorizâts ducj chescj aspiets.”
“Val e Rualp – e dîs Valentina Cozzi – a son dôs frazions unidis dal comitât, che a àn a cûr i lôr events. Cul progjet o lin inmò di plui a valorizâ chest teritori.”
◆ Par chel che al tocje i events culturâi, i prins apontaments a son in Fevrâr cu la mascarade di Val e Rualp; dai 25 di Fevrâr al 18 di Març, a Darte, laboratori di scriture musicâl cun Doro Gjat e Fè, sore nuie e viert a ducj; ai 18 di Març, intes dôs frazions, apontament cu “La femenuta”, rituâl leât al mont pagan; ai 25 di Març, te biele plêf di Sant Martin, incuintri di archeologjie su “Cjarsovalas”; il prin di Avrîl, tal centri sociâl di Val, inaugurazion “Musica 2.0: aperitîf e open MIC”; ai 8 di Avrîl, prime escursion par scuvierzi Cjarsovalas.
◆ Il rest dal programe al vignarà publicizât intal timp.
“Par nô, vivi in mont al è simpri stât un privileç, e di chest o sin braurôs – al dîs Erick De Cillia – e o pensi che i zovins come me no barataressin i servizis a disposizion tes citâts cul spetacul da nature che o vin ator di nô. Cuant che Stefano De Colle nus à domandât di colaborâ al progjet, o vin acetât subit. Chescj events organizâts intes nestris frazions a cjapin inmò plui valôr dal moment che al è ancje l’interès de comunitât, e o vûl crodi che chescj progjets a judin a fermâ il dispopolament dal nestri teritori e, parcè no, a creâ puescj di lavôr pe int che e vîf achì.” ❚