LA CUISTION DES PROVINCIIS. Rome, Bruxelles e cumò Triest: il centralisim al cope il Friûl. La peraule al President Pietro Fontanini

“O sin mâl, un grum mâl. A stan copant il Friûl. Dopo il centralisim di Rome e di Bruxelles – che di chei o savevin di agnorums in ca – cumò o vin di frontâ chel de Regjon”.
Il president de Provincie di Udin, Pietro Fontanini, al à la muse scure cuant che tal so ufici si fronte la cuistion des Provinciis e di ce che al sarà se, come che al pâr, la maiorance regjonâl e larà indevant drete pe sô strade di fâlis fûr il plui in curt pussibil. L’obietîf ultin al è rivâ a scancelâ dal Statût regjonâl il tiermin “Provincie” e par rivâ insom in Regjon si sta lant indevant su doi trois paralêi: une leç regjonâl che e interven su la forme di vôt provinciâl e che a tacâ di Pordenon e fâs deventâ lis Provinciis ents di secont grât, tant a dî che i citadins no eleiaran plui conseîrs e president; une leç di nature costituzionâl che le fâs il Consei regjonâl ma e à di jessi aprovade dôs voltis dal Parlament che e scancele in maniere definitive lis Provinciis dal Statût.
President Fontanini, ce aial intenzion di fâ se il progjet de Regjon al devente realtât?
“O domandarai ai furlans se a son contents di lâ sot Triest e se ur va ben di jessi cence un ent che al è ancje un vôs di rapresentance di une identitât. Cui rapresentaraial i 180 Comuns furlans, cence che e sedi une suaze che ju ten unîts”?
Si podarès rispuidi la Regjon.
“No la Regjon Friûl – Vignesie Julie. Che cun chel aiar che al tire no si sa nancje trope vite che e varà. No viodêso che nus àn bielzà puartât in Venit l’Ufici scolastic regjonâl? Segnâi concrets no biei a ‘ndi vin tancj. Ancje cheste voie mate di scancelâ lis Provinciis”.
Parcè chê muse scure?
“O soi preocupât di chest cidinôr dal Friûl. Tant che i bascs, i scozês, i catalans si fasin simpri plui sintî par difindi la lôr identitât, nô si lassin massacrâ di une Zonte vuidade di une romane e dulà che dome un assessôr, la Santoro, al sa fevelâ par furlan”.
Isal dacuardi suntune organizazion istituzionâl aministrative che e vedi di une bande lis trê provinciis furlanis e di chê altre la aree metropolitane di Triest?
“O speri propit che si cjapi la ocasion des riformis dai ents locâi par fâ dôs areis aministrativis”.
Se no saran plui si Provinciis, cuale forme di agregazion gnove ise pussibile?
“I Aster a àn falît; lis agregazions comunâls no puedin rapresentâ i valôrs di fonde dal nestri teritori, il lôr al è un metisi adun funzionâl”.
Ma in timps di miserie no bastial sigurâ la funzionalitât?
“Inalore no conventin nancje lis Regjons. A bastin lis Prefeturis. Ma cussì dulà vadie a finî la gjestion federaliste di un teritori”?  ❚
✒ Antonella Lanfrit