Il linguist e ativist udmurt Albert Razin
si è dât fûc par protestâ cuintri
des politichis russis di snazionalizazion
La Zornade Europeane des Lenghis e je stade memorea-de cuntun grum di iniziativis in dut il continent. Chest an la “fieste” dai 26 di Setembar e à finût disevot agns, stant che chê date e jere stade sielzude de bande dal Consei di Europe ae fin dal 2001, che cun chel stes spirt al jere za stât proclamât “An European des Lenghis”, cul intindiment di promovi la diversitât culturâl e linguistiche e di sburtâ l’aprendiment, la cognossince e l’ûs di plui lenghis. Chei argoments e chei obietîfs a jerin stâts condividûts ad in plen ancje de bande de Union Europeane e in particolâr de Comission. Di in chê volte sei la istituzion continentâl plui “antighe”, metude adun intal 1949 cun chê di promovi la democrazie, i dirits umans e il progrès sociâl e economic, che chê che cul Tratât di Maastricht e à cjapât il puest des Comunitâts Europeanis, a àn promovût azions e events a pro de riflession e dal aprofondiment in cont de impuartance – culturâl, formative, politiche e socioeconomiche – dal pluralisim linguistic intes nestris societâts.
La Zornade Europeane des Lenghis e ven memoreade cuntune atenzion specifiche e cuntune cierte continuitât in Friûl, comunitât teritoriâl che e je segnade in maniere peculiâr de diversitât linguistiche. Ancje chest an a son stâts inmaneâts diviers apontaments in ocasion dai 26 di Setembar. Il Centri di documentazion europeane “Guido Comessatti” de Universitât dal Friûl e la cooperative Informazione Friulana, cu la poie de Rapresentance in Italie de Comission Europeane, a àn metût dongje une schirie di trasmissions tematichis su Radio Onde Furlane, dai 23 di Setembar ai 4 di Otubar (che si pues tornâ a scoltâlis ancjemò in rêt ae direzion https://www.spreaker.com/show/lenghis-jeziki-sprachen-lingue), e un incuintri public, che si à davuelt sabide ai 28 a Udin tal Palaç Di Toppo Wassermann dal Ateneu, là che inte sale Pasolini si à fevelât di educazion plurilengâl, di lenghis di grande difusion, di lenghis minorizadis, di migrazions e di dirits linguistics e inte sale de jentrade e jere une esposizion di materiâi di informazion, di promozion e di documentazion in cont des lenghis – e intes lenghis – dal Friûl (e jere ancje “La Patrie dal Friûl”…). I passe cent di lôr che a àn partecipât al event – la plui part a jerin students des scuelis superiôrs di Udin, “Deganutti” e “Percoto” – a àn vût la pussibilitât di confrontâsi cu lis diviersis dimensions dal plurilinguisim in Europe e in Friûl e cu lis esperiencis di cui che intes istituzions publichis e intes associazions di chenti al è impegnât a pro dal pluralisim linguistic tant che patrimoni, dirit e oportunitât par ducj.
Al è clâr che la cuistion des lenghis no je impuartante dome par une zornade ad an, ma e vâl ducj i dîs. La Zornade stesse e je stade “inventade” cun chê vision largje. Cundut achel no si pues dineâ che in tancj câs, fintremai ancje cuant che e ven memoreade la Zornade Europeane des Lenghis, e sedi la tindince a sierâ la cuistion intal timp – dome pai 26 di Setembar – e magari ancje dome in direzion des lenghis forestis plui dopradis, lassant in bande dut il rest.
Par sigûr la cuistion dal plurilinguisim e dai dirits linguistics e reste vierte e salacor ingredeade. Juste un pâr di setemanis prime dai 26 di Setembar lu à ricuardât intune forme estreme il linguist e ativist udmurt Albert Razin, che al è muart intal ospedâl di Izhevsk cualchi ore dopo che si veve dât fûc fûr dal palaç dal Consei di stât de regjon autonome de Udmurtie, inte Federazion Russe. Il so al è stât un at di proteste cuintri des politichis di snazionalizazion e in particolâr cuin-
tri de leç fate buine dal Parlament rus l’an passât che e puartave di curicolâr a opzionâl l’insegnament des lenghis diferentis dal rus – tant che l’udmurt – intes republichis e intes regjons autonomis cuntune popolazion native no russofone. ❚
Marco Stolfo