Jolanda Di Colò: aziende locâl agroalimentâr in evoluzion continue

La Aziende Jolanda De’ Colò, cun sede a Palme, e scomence la sô ativitât intal 1976 tant che produtôr di specialitâts: grassinis di ocje de tradizion furlane, salmons salvadis fumâts e foie gras.
Vuê e prodûs plui di 100 specialitâts de tradizion taliane e e je selezionadore di ecelencis alimentârs pe alte ristorazion e pe gastronomie di dut il mont. Si autodefinìs une “artesane dal gust” ancorade a fuart ae grande tradizion furlane di lavorazion des cjars e no dome.
La Jolanda Di Colò, nassude su lis olmis de tradizion de famee Pessot che le vuide, e je cressude e si è ampliade in graciis dal inzen, de creativitât, de inovazion continue e di une piçade di fortune. E à rinovât di un continui i siei prodots e e à ampliât lis sôs liniis gastronomichis ancje pe ristorazion, cun marchis di ecelence e in esclusive.
L’impegn al è simpri stât chel di ufrî il miôr de proprie produzion e de proprie selezion che si inricjìs di novitâts un an daûr chel altri, cun prodots di grant lustri, ae insegne de cualitât tant che segn di ecelence.
E je la uniche aziende produtore taliane di foie gras, specialiste te saladure e te marinadure di cjar e pes e ancje cultore de aromatizazion dai prodots cu la fumadure a frêt cun lens preseâts, e cun di plui esperte des tecnichis di cuete dai prodots a basse temperadure.
Plui di 2.000 prodots a catalic tra materiis primis, semilavoradis e lavorâts che a vegnin di dut il mont, a son il risultât di colaborazions comerciâls impuartantis cui miôr produtôrs e selezionadôrs dal setôr.
L’implant produtîf, di plui o mancul 5.000 metris cuadris, si cjate inte zone industriâl di Palme e al è componût di trê reparts produtîfs: produzion pes, dulà che a vegnin marinâts e fumâts i salmons; produzion cjar, par grassinis di ocje, de raze suine mangalica, cjars marinadis e grassinis cuetis, cusine pe lavorazion dal foie gras. Ben 26 laboratoris dedicâts a ogni lavorazion specifiche cun chê di garantî une sigurece e un control de cualitât dai prodots plui amplis. Infin la aree imagazenament e magazen, sede logjistiche pes spedizions su dut il teritori nazionâl e tal forest. Un veterinari e doi tecnolics alimentârs, cun di plui, a controlin e a ispezionin che dutis lis materiis primis dopradis e distribuidis a sedin conformis aes normis e di cualitât massime.
La Jolanda di Colò e je in possès di ducj i certificâts UE par sezionament, stagjonadure, fumadure e cuete di cjar e di pes, dal Certificât par trafic in esportazion in Cine, Russie, Hong Kong, Emirâts Arabis Unîts, di Certificât Halal, di Certificât Kosher e di Certificât BIO.
E opare in ben 15 diviers Paîs!
E à plui di 4.000 clients che a apartegnin prin di dut ai doi setôrs HORECA e NORMAL TRADE e e je ben supuartade di plui o mancul 100 agjenziis dislocadis sul teritori nazionâl.
Il so faturât al è cressût in maniere progressive dai 11.582.293 intal 2009 ai 13.878.655 euros intal 2014, pûr vint patît ancje il bloc de trafic in esportazion bande la Russie che intal 2013 al rapresentave il 10,41% dal so faturât forest. Chest faturât al è stât recuperât daurman di une plui grande penetrazion viers altris marcjâts tant che Slovenie, Ongjarie, Svuizare e Cravuazie e in mancul misure bande chei altris stâts CEE e extra CEE.
Ancje l’aspiet ocupazionâl nol è indiferent e al à regjistrât un aument progressîf rivant a 40 dipendents, cul 68% di lavoranzie feminine, che lis sôs ‘mans’ a san garantî produzions di ecelence intal segn de semplicitât, inte cualitât. ❚
✒ Claudia Sacilotto, Segretarie regjonâl FAI CISL F-VJ