Joi ce ben, la Union Valdôtaine…

La ultime tornade eletorâl in Val di Aoste, sedi chê regjonâl che chê aministrative de citât cjâf lûc, e à viodût il sucès de Union Valdôtaine, il partît autonomist che al è stât il plui votât e cumò al guvierne cun Forza Italia in consei regjonâl e cul centriçampe tal Comun di Aoste.
Isal un scandul? Isal cualuncuisim politic o doroteisim ideologjic?
◆ Lôr, chei de Union Valdôtaine, a spieghin: “Di otante agns incà il nestri Moviment al cîr di otignî dome un obietîf: il ben de Val di Aoste e dai Valdostans. Cui che al cîr di sierânus tai schemis dal bipartitisim talian drete-çampe nol cognòs la nestre storie e al dismentee che la nestre azion e smicje prime di dut al progrès sociâl e economic de nestre Regjon. Cun chest spirt e tal cuadri di un dialic interni simpri trasparent e ecuilibrât, la Union Valdôtaine e à sielt, dutune cui siei orghins diretîfs, di sierâ un acuardi politic istituzionâl cuntun fin specific cun Forza Italia, par fâ plui facil rivâ adore a otignî i obietîfs essenziâi pe Val di Aoste… Fuarte de sô storie e fedêl ae sô identitât politiche nassude dal antifassisim, la Union Valdôtaine e cjale al futûr cun responsabilitât e impegn, cussiente che servî la Val di Aoste e reste la sô mission prioritarie. Lis feminis e i oms dal Moviment a laran daûr ancjemò a difindi a nivel regjonâl, nazionâl e european, i valôrs de autonomie, dal federalisim e de sussidiarietât, lavorant dentri de societât e des istituzions par ufrî rispuestis concretis aes necessitâts di dute la comunitât valdostane” (sît de Union Valdôtaine – Nouvelles: Servir la Vallée di Aoste, hier comme aujourd’hui, 7/11/2025).
◆ “Lis elezions comunâls di Aoste – a disin simpri chei de Union Valdôtaine – a àn mandât un messaç clâr e fuart de bande dai citadins di Aoste: la Union Valdôtaine si è confermade come il Moviment plui votât in citât. O sin braurôs ma lu considerin soredut come un impegn rinovât tai confronts de nestre comunitât. I nestris elets a rapresentin vuê la continuitât di un leam profont cun Aoste, fat sù tal timp cul stâ a sintî, cu la presince sul teritori e cu la capacitât di rispuindi cun concretece aes necessitâts dai citadins. No si trate dome di un sucès politic, ma de conferme di une fiducie: chê di un popul che i ricognòs al Moviment la fuarce di meti dongje, di guviernâ cun ecuilibri e di difindi i valôrs e la identitât valdostane” (sît de U.V. – Nouvelles: la Union Valdôtaine, première force politique à Aoste, 15/10/2025).
◆ Nol coventarès altri, chest al è za il program di un partît autonomist.
◆ In Friûl o podaressin obietâ: “si ma lôr a àn za otante agns di storie daûr”… o pûr “si ma nô o vevin la tendine di fier”…, o ancjemò: “e cemût le metìno cui triestins che cun lôr si spartìn cheste tiere sfortunade… e cul sisteme eletorâl di vuê che nus oblee a sielzi drete o çampe…, ma intant che lôr a àn la France daûr… il Furlan ‘daûr des spalis nol à nissun…”
Dutis cuistions veris ma prime di dut e reste la cussience di vê une identitât, di jessi part di une comunitât, di cognossile e rapresentâle fint insom, rispuindint aes sôs necessitâts cun concretece. Prime si partìs e mior al è…
E po dopo sperâ.
«A vegnarà ben il dì che il Friul si inecuarzarà di vei na storia, un passat, na tradision!» al diseve Pasolini autonomist za tal 1945, par altri ricuardât de Union Valdotaine (sît de U.V. Nouvelles: Pasolini e l’autonomismo: une réflexion de Luciano Caveri, 4/11/2025).
Nol è mai masse tart. Mai si partìs, mai si rive. Al sarès suficient copiâ. ❚