INCHIESTE: R/ESISTI IN MONT. Esperiencis e buinis pratichis intune mape digjitâl. Une rispueste concrete aes dibisugnis de int

La presentazion dal “esperiment relazionâl”
– espuartabil ancje in altris puescj – si le fasarà in Autun
Passìn cumò al Lui di chest an. Se i tiessidôrs di comunitât (che a vevin di “ricognossisi”, ognidun par so cont e scuvierzint chei altris “artesans de coesion sociâl”) a son stâts un prin pas, chest an no si podeve che tornâ a cjatâsi par capî “il stât de art”. Di une bande, par viodi indulà che si è rivâts, di chê altre par provâ a sconfinâ inte culture materiâl, parcè che ri/costruî lis comunitâts al somee propit un lavôr par mestris artesans. Che di cualchidun a àn imparât, e che a puedin e a podaran insegnâ a chei che a rivin dopo, tal timp.
Il titul cjatât pal incuintri di metât Lui de Anpi “Magrini” (che e zuiave chest an ancje jê cu lis peraulis, disint che pal avignî a son “Anpi Margini”) al è stât chest: “Il stât da la art: tramis e mapis di Comunitât ative in Cjargne”. Al è stât cjapât ad imprest il titul dal Circul di studi che al à tentât di codificâ il mont sociâl de mont cjargnele, par metilu jù intune mape digjitâl in vie di preparazion (e che e sarà presentade in Autun), dulà che “ponts fisics” e “ponts metafisics” (cheste ultime definizion e je stade sugjeride dai tecnics dal Ufici di plan de Union teritoriâl intercomunâl, UTI de Cjargne Michêl Zuliani e Patrizia Gridel) a puedin concori a definî la gjeografie des relazions e dai lûcs esistents e pussibii di une tiere vive.
Su lis pagjinis da La Patrie dal Friûl o provìn cussì a meti a fûc i contignûts dal Circul di studi “Mapis di Comunitât ative” che – partint di une gjeneriche panoramiche sui servizis di prossimitât e di domiciliaritât lizere, orientâts a dâ rispuestis aes fassis plui debilis de societât – al à volût, tal dialic dai aderents al Circul (int pardabon ative intai setôrs individuâts tal 2017, includûts “utents” e operadôrs dal Centri di salût mentâl di Tumieç), centrâ la figure dai zovins, vêrs atôrs dal divignî.
E che, dispès, a son invisibii ai voi dai “grancj”, intal tentatîf par nuie facil di fâ incuintrâ i dibisugns des comunitâts cun gnovis oportunitâts pe int di vincj agns o sù par jù, tignint cont des lôr aspirazions e invistint inte fiducie pal lôr savê fâ.
E cussì, e je daûr a vignî fûr une mape prototip di tancj colôrs, che e cjape dentri i lûcs fisics viodûts intal percors itinerant di studi (dal ristorant Pura Follia di Gjiviane al Circul La Nestre Famee di Liussûl), lis rêts impuartantis (i servizis sociâi istituzionâi par zovins e anzians e, par esempli, la Associazion des fameis de Val dal Tiliment), la rêt sociâl – interessante par plui motîfs – di Sapade/Plodn, gnove (o di gnûf) comunitât cjargnele, par rivâ a butâ jù fintremai la gjeografie dai desideris e des delusions. Une mape che e fasarà cjatâ, cun chês altris, vôs gnovis intal imagjinari cjargnel. Intuibil un pôc di chest “campionari”: servizis pai zovins (dai traspuarts di doman ai locâi publics, dai spazis co-working ai sports alternatîfs al balon), negozis multiservizis di comunitât, fragjilitâts, minorancis, margjinalitâts, lûcs par stâ cui animâi, agriculture sociâl, ocasions di viaç, lûcs di scambi intergjenerazionâl e di trasferiment dai mistîrs, abitâ coletîf, radios e spazis di autogjestion, gjeografie des iniziativis des feminis. E vie indenant, tra realtât e siums di une comunitât che e à bisugne di – e che e vûl – cressi.
Par dî che, intune comunitât ative, il presint e il futûr al è meti intes mans de int che e vîf e che e lavore in mont struments informatîfs che a sedin bogns di fâ intuî lis oportunitâts (ancje legjislativis e finanziariis), di stimolâ la fantasie dal (im)pussibil, di coneti talents dal teritori e di valorizâ iniziativis pôc visibilis.
Une sorte di esperiment relazionâl, che al sedi espuartabil in altris puescj de mont furlane e che si vierzi a cognossi esperiencis e buinis pratichis di cui che al à savût cjatâ o inventâ buinis stradis in Friûl e intal mont. ❚
Claudio Pellizzari