In Slovenie l’interès pal furlan al cres

In Slovenie l’interès pe lenghe furlane al cres di an in an. Danila Zuljan Kumar, che e lavore pe Academie slovene di Arts e Siencis dulà che e je diretore de sezion gurizane, nus spieghe cemût mai che i è vignude la idee di clamâ Cadorini ae Universitât di Gnove Gurize, dulà che jê e insegne dialetologjie e li che in particolâr e à tignude la part teoriche dal cors in cuistion: «Un pâr di agns indaûr, tes mês lezions di dialetologjie slovene – e spieghe Kumar -, o ai vût bisugne di savê alc di plui sui vicins furlans par vie che i nestris dialets des zonis ocidentâls de Slovenie a àn une vore di olmis di lenghe furlane, e ducj i doi i popui a àn alc in comun te lôr storie. Cussì, cuant che o ai cognossût Giorgio Cadorini mi è vignude la idee di proponi al dean de facoltât di tignî lis lezions di lenghe e leterature furlane». Duncje, il letorât tacât chest an nol è il prin che si fâs a Gnove Gurize: «La prime volte – e conte Zumar – lu vin fat e po par un pôc no si à fevelât, ma vie pal Istât dal 2017 il dean de facoltât mi à clamade e mi à domandât se o podevi inmaneâ ancjemò un letorât. E cussì o ai fat: o vin vût trê students sul program di storie e culture e doi su chel di lenghe slovene. O sin dome al inizi, ma un pôc ae volte…». Giorgio Cadorini, che al vîf inmò inte Republiche Ceche, par solit al ven in Slovenie par dôs setemanis e al fâs cinc lezions di furlan par zornade: prime di lui, Zumar e ten cuatri lezions su la storie dal Friûl e sui contats jenfri furlans e slovens. (p.c.)