Il Teatri Stabil Furlan al scree la sô prime Stagjon

Il Teatri Stabil Furlan (Tsf) al è pront par screâ la sô prime stagjon teatrâl!
◆ Otime la partence tal mês di Mai cu la prime produzion “La Cjase. Lagrimis di aiar e soreli”, lade in sene ancje in forme itinerante intai lûcs di Siro Angeli. Al è vignût daspò il studi su Carlo Michelstaedter “Carlo e Nadia”, cu la prime a Mittelfest e replichis a Cormons, San Vît dal Tiliment, Udin e Gurize; e po i siet episodis video de serie realizade in colaborazion cu la Fondazion De Claricini Dornpacher “Dante par furlan”, e une ripropueste di chest sogjet in presince. E di cumò indenant, il centri di ricercje e produzion teatrâl furlan – direzût dal atôr Massimo Somaglino – al  met adun propit une vere rassegne teatrâl furlane, che si davuelzarà tal Teatri Gnûf “Giovanni Da Udine”, che la sô Fondazion e je associade al Tsf, dutune cul Comun di Udin, de ARLeF, de Societât Filologjiche Furlane, dal Istitût ladin-furlan “Pre Checo Placerean”, dal Css e de Civiche Academie di art dramatiche “Nico Pepe”.
◆ A son cuatri i apontaments, tacant de fin di Otubar fin tal mês di Març, inmaneâts cun altris iniziativis dongje di calendari, davueltis cun diviersis realtâts culturâls dal Friûl, tal spirt di cooperazion dulà che il Tsf al à lis sôs fondis.
◆ Dutis lis informazion e i inzornaments di chestis novitâts teatrâls furlanis, lis cjatais lant sul sît teatristabilfurlan.it e visitant la pagjine Facebook e il canâl Youtube dedicâts, spazis indulà che si puedin cjatâ diviersis curiositâts e argoments di interès pai amants de lenghe, de culture e de art furlane, teatrâl e no dome.
I titui in program: “Infier”, ai 23 di Otubar, ven a stâi un conciert teatrâl fat in colaborazion cun Mimesis Festival, indulà che si leiarà Dante cun recitazions compagnadis di musichis dal vîf. Al sarà un spissulâ continuât di peraulis e sunôrs di ogni sorte, par une imersion intes vôs di varie nature de opare mestre di Alighieri. Presentazions di Paolo Patui, vôs di Stefano Rizzardi, musichis di Arno Barzan, e tescj gjavâts des traduzions par furlan di Pierluigi Visintin.
◆ Il secont titul al è “Guarnerius”, ai 26 di Novembar, di e cun Angelo Floramo, Fabiano Fantini, Claudio Moretti e Elvio Scruzzi. Al torne il grant sucès di cheste opare dal Teatro Incerto, su la liende dai trê cramârs che a rivin dopo tantis faturis inte abazie di Sant Gjal in Svuizare, par dâ la notizie de muart dal umanist di Dartigne, cence savê pardabon cui che al fos, e scuvierzintlu graciis a di un munic, Adelmus Silvatico.
◆ Il tierç titul de stagjon dal Tsf al è “La Ricercje de puaretât”, ai 20 di Zenâr dal 2022, un oratori par pre David Maria Turoldo, creât dal compositôr e pianist Glauco Venier cun Luca Fantini, che al sarà la vôs che e recite, e autôr dai tescj voltâts par furlan di Carlo Tolazzi. In sene a saran la Orchestre Laboratori “L’Insiùm”, direzude di Michele Corcella, e l’atôr Fantini, par contâ il predi e poete di Coder a trente agns de sô muart, cun leturis senichis e musichis origjinâls di Glauco Venier.
◆ Il cuart titul, pai cuarante agns de muart dal poete di Cjasarse, al è “I Turcs tal Friûl” di Pier Paolo Pasolini, ai 3 di Març dal 2022. O ben, il test teatrâl furlan che inte storie al à vût plui visibilitât fur dal Friûl. La leture seniche e je curade di Fabiano Fantini e Massimo Somaglino, cui atôrs Luca Altavilla, Fabiano Fantini, Daniele Fior, Renato Rinaldi, Marta Riservato, Marco Rogante, Massimo Somaglino e Aida Talliente. I videos a son par cure di Entract di Carlo Della Vedova e la produzion dal spetacul e je dute opare dal Tsf. ❚