Il Spiritussant us insegnarà

O sin tal timp di Pasche: pal cristian un timp dal dut speciâl par vie de resurezion dai muarts di Crist, un event dal dut gnûf che al à cambiade la storie de civiltât umane. Il vanzeli di cheste ultime domenie di Mai (Zn 14, 23-29) al è colm di fiducie, di sperance, di vite. Fra l’altri Jesù nus dîs: Il Confuartadôr, il Spiritussant che il Pari al mandarà tal gno non, lui us insegnarà dut e us fasarà vignî tal cjâf dut ce che us ai dit. In pratiche nus vise: te storie che si cjatìn, la inteligjence artificiâl no varà la ultime peraule e i grancj dal mont cun ducj i lôr armaments e dazis no rivaran a copâ il gust di vivi de int. Al è un pôc il pinsîr di Albert Einstein cuant che al scrîf: “Diu nol zuie cui dadui. La sience cence la religjon e çuete e la religjon cence la sience e reste vuarbe”. O vin dibisugne des mans dal om te sience e dal Spirt di Diu par savê cemût e dulà lâ.
◆ Tornant ae nestre biele patrie dal Friûl, mi domandi: dulà cjatâ il Spirt di Diu in chest cjanton multietnic dal mont?
◆ Cuant che o lei la Vite Catoliche mi consoli pes iniziativis culturâls, religjosis e politichis che ogni setemane nus vegnin presentadis; cuant che invezit o cjacari cu la int e cui predis, il clime seren al cambie e chel che prime al jere tant biel al cole te ombrene. Al è ce che a disin aromai ancje i cjanâi eclesiastics di Rome: la Glesie dal 1900, centri di culture e di politiche, e je deventade vuê une minorance pôc scoltade e cuntun pinsîr a voltis superât.
◆ Tune situazion di cheste fate, un grop di predis agns indaûr al veve fat presint al vescul Andrea Bruno Mazzocato la necessitât di une assemblee dai cristians: predis, religjôs, laics e laichis par scoltâsi e sintî miôr insiemi il pols de diocesi. In chel sfuarç di dialic, si podeve sclarîsi e cjatâ un teren comun par un avignî dai nestris paîs.
◆ La robe començade te Vierte dal 2018 cuntune letare firmade di vot predis, si è strissinade fra scrits e incuintris cul vescul fin ae fin dal an, cuant che il grup al à capît che al jere miôr molâ: “Abbiamo pensato di porre termine a ulteriori incontri visto il quesito deludente dei precedenti” (Letare al Vescul, 20.12.2018).
Chê iniziative e jere ce che pape Francesc al puarte indevant vuê cun dute la sô autoritât e fuarce: la sinodalitât, il cjatâsi, scoltâsi, cjacarâsi tal rispiet, di là des propriis opinions. Pape Francesc lu dîs clâr: “La Glesie dal avignî o e deventarà un sinodi – popul di Diu che al cjamine insiemi – o no esistarà”. Lui in ogni ocasion al bat su la responsabilitât dal cristian: “Partecipare tutti, è un impegno ecclesiale irrinunciabile! Tutti battezzati, questa è la carta di identità: il Battesimo”. Personalmentri o voi indenant a sintî la esigjence di un confront, di un scambi di ideis, di un cjalâsi in muse di personis che, fûr o dentri de Glesie, a sintin il sens religjôs te lôr vite. Cumò no pues pretindi une assemblee dal gnûf vescul rivât un an indaûr. Bons. Riccardo Lamba al è za di laudâ pe sô umanitât: un don che lui al à tal relazionâsi cu la int, cui predis e par noaltris une gracie di Diu che o vevin grande dibisugne. Tal guvier de diocesi o sperìn che al cjaparà decisions validis par une Glesie plurietniche – popul di Diu – tal clime culturâl e spirituâl, si dîs vuê, dal postmoderni.
◆ Pal moment, o vin dibisugne dal vanzeli: Il vuestri cûr nol à di conturbâsi e nol à di butâsi jù… Il Spiritussant, chel che al confuarte, lui us insegnarà dut… Us lassi la pâs, us doi la mê pâs.
◆ Fiducie duncje, començant però a disgredeâ grops cence soluzion di agnorums incà.
La istituzion eclesiastiche locâl no à mai aplicade al nestri Friûl la sostance de esortazion di pape Francesc aes minorancis etnichis: “È bene che adesso siate voi stessi ad autodefinirvi e a mostrarci la vostra identità. Abbiamo bisogno di ascoltarvi” (19.01.2018).
◆ La mancjade aprovazion dal Messâl par furlan de bande de Conference dai vescui (15 di Novembar dal 2023) e podarès sedi la ocasion par rifleti sul parcè des nestris messis tant puaris di int.
Tune tabele publicade de curie di Udin cualchi mês indaûr a risultin, su 200 predis de diocesi, un centenâr cun plui di sessante agns e almancul uns trente predis forescj rivâts di ogni bande dal mont. Al è un segnâl plui che evident de necessitât di passâ di une Glesie a stamp clericâl a comunitâts di cristianis / cristians responsabii. Se però e rivàs ancje une assemblee costituente di chest popul di Diu tal spirt dai discors di pape Francesc… Magari! Al sarès cuasi un sinodi par segnâ la strade di fâ tune Glesie incjarnade culì, par no restâ i provinciâi di un cjanton e deventâ impen erêts autentics de Glesie di Aquilee in Europe. Il vanzeli di vuê al dîs: il Spiritussant us insegnarà… Ven o Spiritussant; cence di te, ancje cuntun implant eclesiastic eficient e cun dute la inteligjence artificiâl, di cheste situazion no rivarìn mai a saltâ fûr. ❚