IL SIVILOT. Sotans come simpri

Se cualchidun al crôt che pes elezions dal 2013 i zûcs a sedin sierâts, secont me al fale di grues. A scomençâ dal fat che no savìn nancje se, par esempli, si votarâ pe provincie di Udin o mancul, ma chest al sarès ancjemò nuie, stant che no savìn se lis provinciis a saran o no. Ancje pes regjonâls e je confusion, no pal fat che la Region e vegni scancelade ma pes listis che si presenteran.
Di sigûr mi sint di dî che lis siglis, i simbui no saran chei stes. Pal moment, o vin dome la sigurece (definitive?…) tai nons dai candidâts president: Tondo e Serracchiani. Cui daûr di lôr al è dut di viodi. Ma no par un moment di glorie, di autonomie dai politics furlans che a decidin in autonomie une lôr forme di organizazion, ma invezit parcè che ancjemò une volte a son li a spietâ lis decisions di Rome: sotans come simpri
Si cjacare tant di listis alternativis, di “grilins”, di tierce fuarce e il non “Italie” si strace in ogni lûc e grafic eletorâl.
Ta chei dis chi, ognidun al dîs dut e il contrari di dut, cirint di stâ tal mieç cence tal stes timp, mostrâ masse la muse: cjalait la Serachianute su la sielte tra Renzi e Bersani tal so partît.
Tondo invezit nol cjacare cuant al sarès ce cjacarâ: lis FS a stan disint che la Tav no covente plui, la Danieli che tirâ sù l’eletrodot nol è a vonde par tignî la Abs a Cjargnà… e lui al fâs fente di nuie.
L’om di Buri, se si visais, al veve scrit che dôs cuistions a jerin daûr a saltâ fûr: la cuistion de lagune di Maran e la tierce corsie. Cumò a son sul plat e viodarìn cemût che e larà a finîle.
Di sigûr une robe: il Friûl no è si mai cjatât cuntune classe politiche plui scassade di cheste e, par sfortune o destin, e je propit jê che si cjate a comandâ tal moment plui dificil pe nestre tiere. ■
L’OM DI BURI