Il referendum pe indipendence: risultât e considerazions

Il dât definitîf al rive in timp reâl. A miezegnot dai 31 di Otubar si siere il seç eletronic e il tabulât al dîs che a àn votât in 6.707. Pal vêr, lôr, chei di “Res Publiche Furlane” – il moviment che al à inviât il referendum digjitâl pe indipendence dal Friûl – si spietavin almancul il dopli. “Ma al è il numar dai sì, il vêr dât: 85,3%. Su la partecipazion, nô o sin une vore sodisfats! Cui tirial sù sîs mil personis, cence publicitât, dome cul passe peraule, intun mês e cun dome doi incuintris publics che, dut câs a àn puartât plui di mil iscrits al moviment?”, sal domande il puartevôs dal grup, Marco Serafin, tierç ultin par numar di vôts.
I risultâts. Il vôt al jere dopli: referendum e elezion dal Parlament furlan. Sì: 85,3%; no: 8,8%; astignûts: 5,9%. A jentrin te Costituente ducj e 11 i candidâts: Gianni Sartor al è stât il plui votât cun 956 preferencis; po dopo une femine, Sabrina Pivetta (823) e l’esponent dal Friûl orientâl, Stefano Mattiussi (818). Po dopo: Gian Carlo Cesarin (609); Simone Nespolo (350); Loris Cao (293); Jessica Della Via (258); Fabio Brusini (237); Marco Serafin (225); Ranero Bertolucci (196); Alessandro Conte (140). Di indiscrezions, al somee che i votants a vedin une etât jenfri i 30 e i 40 agns.
Oltri i numars. Serafin al comente: “Cheste rispueste de int nus fâs capî che o podìn fâ pardabon ben. Par nô e je la direzion juste par continuâ a lotâ par un Friûl indipendent. E par fâ capî, sburtâ che o sin presints sul teritori, dongje de int e che o lavorìn a pro di cheste cause”. Par Stefano Mattiussi, al è il segnâl che al è in vore un procès di disgregazion dal Stât talian. “Plui o regjistrìn, e lu stin viodint cun Serracchini e cun Renzi, une tendince a centralizâ, plui al è fuart l’impuls centripeti: lu viodìn in Venit, in Sud Tirôl, inte Val di Aoste e parfin tal vieli Ream des dôs Siciliis. L’avignî lu viôt plui tant che une confederazion di teritoris. E il nestri Friûl, tant che une sorte di Svuizare, dentri de Mitteleurope”.
Al lavôr, daurman. “Cumò si trate di lavorâ a un document ordinamentari de Republiche dal Friûl”, al dîs Stefano Mattiussi. In pratiche, la Costituzion. “Cun cheste Cjarte o larìn in sede Onu, l’unic organisim internazionâl che al pues decidi su la nestre indipendence. O scomençarìn a scrivilu daurman, si darìn dongje in Dicembar”. Ma il grup al à intenzion di tornâ a proponi la consultazion, ogni an e forsit ancje cun schede di cjarte e matite copiative. “Plui o sarìn, plui o varìn i numars par fâ valê la nestre fuarce indipendentiste: o volìn cressi”.

A torzeon. La gnove Cjamare no à une sô sede fisse. Il Parlament si darà dongje in mût itinerant, in diviers paîs dal Friûl. Al varà di elezi un president. Prest a scomençaran a lavorâ, ancje, lis comissions, sorte di orghins propositîfs, stîl Cnel par intindisi: a saran componudis di sempliçs citadins e a podaran puartâ lis lôr ideis. Pal moment, une des prime decisions che a vignaran cjapadis e sarà chê di sostignî la economie locâl. “O volìn jessi di utilitât – al dîs Mattiussi -. Par chest o fasarìn di mût che i prodots furlans a vedin un element di ricognossiment par che la int ju sepi ricognossi e ju compri. Di mût che i nestris bêçs a restin chi”. La Republiche Furlane no à ancjemò un imni. Chel che al ven pandût tant che tâl – il toc neomelodic “Friûl Friûl la Patria mia” – al è, par il vêr, apocrif. Nol à vût ancjemò il bon acet uficiâl. Il Parlament al sarà sovran ancje su chest. ❚
Oscar Puntel