Il president di Efasce: cumò miôr un moment di polse, ma disponibii al dialic

Al domande “un moment di riflession, une polse” il president di “Efasce – pordenonesi nel mondo”. Daspò la tampieste e i flums di ingjustri finîts sui gjornâi “che a àn esagjerât cetant”, Michele Bernardon nus dîs dome chestis peraulis, clamât al telefon: “O stimi che al fasi ben a ducj i atôrs che si ocupin dai coregjonâi tal forest pensâi parsore, dopo dut ce che al è sucedût. E o zonti che, po dopo, ducj i sogjets a varan di sentâsi ator di une taule e di discuti in mût seren, cence preconcets, dal avignî des associazion e dal rûl tal mantignî i rapuarts cui nestris emigrâts tal forest. Dal rest, jo o ai simpri manifestât plene colaborazion cun ducj chescj ents, no ai problemis a colaborâ, baste che si fasi sul stes plan, cun pari dignitât”.
Struc des pontadis precedentis. La polemiche Ente Friuli nel Mondo – Efasce e jere sclopade dopo che sul Messaggero Veneto, Bernardon al veve dite: “Ente Friuli nel Mondo si ocupe dome di broade e muset, e i sei associâts a son emigrâts peçotârs”. Pittaro al à convocade subite une conference stampe di urgjence, par rispuindii, a non des centenârs di clamadis di proteste e di mails ricevudis.
Bernardon al à afidade la sô repliche a un comunicât: “Il cuadri burît fûr in chescj dîs al riscje di mostrâ une lote fratricide jenfri associazions; aspiet, chest, che no nus aparten. No son lis polemichis, ma i progjets metûts in vore a pro dai coregjonâi, i elements che a dan fuarce aes associazions. Se di no, si riscje di colâ in logjichis di spartizion, pierdint di voli la meritocrazie, che di chescj timps e scugnarès jessi invezit il criteri par fâ lis sieltis”.
Pal president di Efasce, al è plui impuartant lavorâ insiemi e fâ “masse critiche” su progjets comuns, disint no a une vuere pe spartizion des risorsis. “Il pericul al è chel di pierdi di viste la reson stesse che o esistìn: valorizâ, tutelâ, sostignî chei che a àn lassât lis nestris tieris e cul propri lavôr a àn contribuît e a stan contribuint a dâ un lôr apuart ae cressite dai Paîs che ur àn dât acet”. “Se i fonts a disposizions, tancj o pôcs che a sedin – al continue Bernardon – a son dal sigûr impuartants, ce che a vâl di plui a son lis ideis e i progjets metûts in vore a pro dai coregjonâi. Su chescj si à di misurâ la capacitât di un ent, e no dome suntun ipotetic numar di iscrits. Ogni associazion e à une sô dignitât che e merete rispiet pal lavôr che e davuelç. La colaborazion e burìs fûr dal dialic e dal confront; cheste e je la filosofie nestre, che nus à animâts fintremai in dì di vuê”. ❚
Oscar Puntel