✽✽ Al è simpri plui evident che l’asset istituzionâl di cheste regjon nol pues jessi dismenteât o, piês ancjemò, platât. Al baste di fat cjalâ lis pagjinis dai cuotidians di chescj ultins mês par inacuarzisi di cemût che il probleme al sedi sot dai rifletôrs dai osservadôrs plui acûts de politiche nostrane. E je di pôcs dîs indaûr la analisi di trê sindicaliscj, Muradore, Ceschia e Dorigo, ex, ma no par chest mancul atents a ce che al sucêt a Triest, che di li si dedûs cetant grant che al sedi il pericul di un acentuâsi dal centralisim regjonâl.
✽✽ Un pericul? No, e je une ciertece che di chestis colonis o pandìn aromai di agns e sot ducj i governadôrs che si son sucedûts, segnalant une tindince che e je simpri stade presinte intes altis sferis dirigjenziâls de Regjon, ma che e je deventade plui agressive e arogante cun Serracchiani e cumò cun Fedriga.
✽✽ Çampe e diestre a pierdin significât devant de disposizion tignude in merit al Friûl e al rûl che al à di vê inte complessitât aministrative e politiche di dute la regjon.
✽✽ Fevelìnsi clâr: al orizont nol è un progjet concret di indipendence e “O fasarìn come la Catalogne e la Scozie” e reste pal moment dome une afermazion di principi, la jentrade di un program ancjemò dut di definî intal so viaç di atuazion.
✽✽ Svintulìn pûr lis bandieris des piçulis nazions oprimudis e cence stât, ma stin atents che intant no si vedi di tirâ jù la nestre. Anzit, che – fuarts di une propagande di minculpop di tradizion fassiste, che e tire bande la omologazion obligatorie di ogni robe sot de egjide “effevvuggina” – lis stessis peraulis Friûl e furlan a vegnin di fat butadis fûr dal vocabolari cuotidian no dome de politiche, ma ancje de gjeografie, de storie, des mangjativis che o mangjìn, dal vin che o bevìn. Il ricat al è fuart: o cun nô – e duncje o sin ducj FVJ – o pûr sparîts dai belançs dai assessorâts, fûr des convenzions, des iniziativis.
✽✽ Ve che alore e covente une clamade a ducj chei che in chescj moments tant decisîfs pe nestre int a scrivin e a fevelin di centralisim: no stait a crodi di podê convinci cui che vuê al à il podê o cui che al aspire a sostituîlu. I partîts talians lu àn intal lôr Dna, il statalisim al alberghe, in formis ideologjichis diviersis sedi a diestre che a çampe.
✽✽ Puartìn fin insom la critiche: par bati il centralisim e covente vuê une divierse articolazion des istituzions, al vignarès di dî “dait al Friûl chel che al è dal Friûl, a Triest chel che al è di Triest”.
✽✽ La Serracchiani e à falît in maniere misare cu la cancelazion des provinciis e cul disastri des Uti. Al stes disastri al è lât incuintri Fedriga cu lis svoladiis e ridiculis Edr, acronim par definî i (discognossûts al mitent) Ents di decentrament regjonâl.
✽✽ Al è clâr che cence une propueste crodibile e buine in sens storic, no saran altri che lis decisions cjapadis a Triest, cun in bal i milions di euros de Europe pe riprese economiche.
✽✽ Dulà larano, a ce coventarano? Fasêtsi la domande e daitsi la rispueste. ❚
