Il menau di Çurçuvint: fâi cuintri ae crisi restant in Cjargne

Vivi in mont al è simpri plui dificil: no je retoriche, ma realtât, ma si pues ancje sielzi di restâ.
Simone Turco, 25 agns, di cuasi doi agns al fâs il menau. La sô e je une sielte coragjose: al jere sot paron e par colpe de crisi al è restât a pît cul lavôr. Dopo doi mês che al jere a cjase, lu veve cirût une dite par lâ a lavorâ lontan: al sarès tornât dongje dome 15 dîs ogni 3 mês di lavôr e al varès vût une buine paie. Ma Simone al veve za alc altri tal cjâf: deventâ un menau. Al à tirât dongje un pôcs di imprescj e planc planchin al à tacât a fâ i prins lavoruts.
IL LAVÔR_“Mi ocupi totalmentri dal bosc – al conte Simone – dal tai dal arbul ae vendite. O lavori ancje par altris ditis, magari fasint dome il tai dal legnam, o dome puartantlu fûr te strade. Vint esperience cul escavadôr cualchi dite mi clame. O lavori pai privâts e pes grandis ditis. O ai provât a proponimi tal gno Comun di Çurçuvint ma no ai vût bon esit.
Al comun i vevi fate une propueste che nissune imprese e pensarès di fâ: se o vês manutenzion di fâ di stradis, mûrs, murets, acuedots, slacs, oparis mistis, jo mi furnìs cun dut ce che al covente e o fâs i lavôrs e invezit dai bêçs mi paiais cul legnam. Mi è stât rispuindût che no si pues. O ai domandât se o podevi vê in gjestion un bosc: mi àn dit che no vuelin. Mi sei proponût di netâ la strade di mont ma il comun mi à rispuindût che si ocupe la protezion civîl; di netâ la nêf a clamade, ma mi àn dit che nol è pussibil. Ancje se in altris comuns si fâs. Nol è nuie meti in pîts une imprese: il dificil al è fâle cressi parcè che, magari cussì no, nissun ti da une man. A disin che ur van incuintre ai zovins: e je une maree di balis. O sotscrîf ce che ti dîs. Parcè che plui che a dâti, fale chei cuatri che ti cognossin, a son ducj pronts plui a gjavâti alc.”
UNE ZORNADE CHE NO FINÌS AES CINC _ “E po tancj sacrificis: no esistin sabidis o domeniis, ploie e soreli. Nol esist che un menau al puedi lâ a Lignan il mês di Avost. Ciert: sot paron o fasevi il gno e cuant che a jerin lis 5 o lis 6 o vevi finît, o cjolevi la machine e magari prime di rivâ a cjase mi fermavi cui amîs a bevi l’aperitîf. Cumò o finìs aes 5-6, o ven a cjase e o ai da preparâ la robe pal domans, telefonâ a chei che mi àn di dâ i bêçs, telefonâ a chei che mi àn di dâ robe, in pratiche proviodi a dut: al comence il secont timp de mê zornade lavorative.”
TIGNÎ DÛR_Ma Simone al cîr di tignî dûr, parcè che al è tacât ae sô tiere, ancje se a pene scomençât al pensave che al fos plui facil jentrâ tal zîr: “Fin che o rivi a pari no mi lamenti, dal moment che o larai a rimeti i pensarai sore. E che no mi si disin che i zovins no àn voie di fâ… Cumò o stoi tacant a ocupâmi ancje di lens di brusâ: dal bosc a cjase tô.”
La Cjargne, par Simone, e reste il teritori plui biel di Italie e il puest dulà podê inmò tentâ di vivi e, parcè no, di lavorâ. La uniche pecje e je la mancjance concrete di un poc, di un jutori pai zovins che come lui a cirin cun fadie e cun fuarce di volontât di no molâ. Ma puedial bastâ par lâ indevant?
Direzion mail: utilizzazioniboschive.st(chiosule)gmail.com
Cel. 34 05 03 47 93 ❚
Marta Vezzi