Fì di un marinâr, al cjantave la maravee pe culture ancestrâl dai Balcans

Stefan Mitrov Ljubiša (1824-1878) al è nassût a Budva, cumò capitâl de Črna Gora (Montenegro par talian), cuant che la sô tiere e jere sot dal Imperi de Austrie in chê rêt gjeopolitiche delicade là che la reson des nazions e je stade scjafoiade a bon pro di chê dai stâts, tal doman dal Congrès di Viene (1814-1815). Al à duncje simpri sintude, fuarte, la necessitât di cjantâ la libertât e la indipendence dal so popul, menaçade di stâts plui grancj e plui fuarts in dut il cori de storie: i Romans che a someterin i Ilirichis, e po dopo i Venezians, i Turcs, la Corone di Viene. La lenghe dal mâr, fevelade massime in chel dialet Venezian de cueste orientâl dal Adriatic, e deventà dal moment un imprest par podê lavorâ e par mantignî la famee, stant che il pari, un marinâr, al murì cuant che Stefan al veve dome cutuardis agns. Dut chest al stiçà dentri di lui une grande cjarie identitarie, la fuarce di un riviel che lu puartave a difindi la lenghe e la storie dai siei antenâts, chel clan dai Paštrović, int dure e fuarte, che e fo di grande ispirazion pai siei lavôrs leteraris. Inmagât de tradizion folcloriche dai cernagorans, dai cjants, des liendis, al rivà a capî che cence une rinassite de lenghe, la culture e je destinade a pierdisi, e cussì al à tacade une campagne fuarte di oposizion scombatude massime cuintri de lenghe taliane, considerade tant che une espression di dominance culturâl sui slâfs meridionâi. Nol acetave che par lavorâ si ves di cognossi il talian e si refudave di pensâ che la lenghe di Dante e fos rapresentative di une forme di civiltât plui alte che no chê slave, dispreçade tant che une espression barbariche cence nissun interès. E cussì al tache a scrivi par serp, recuperant la grande tradizion orâl di chel popul e cjapant inspirazion par costruî contis che al cirive sù pes monts la sô cifre espressive origjinâl. Cheste e fo la sô bataie ancje tant che politic e deputât a Viene, là che al difindarà simpri i dirits des lenghis minorizadis di ducj i popui sot di chê corone. Tal 1845 al tache a publicâ sul boletin culturâl plui impuartant di dute la cueste orientâl adriatiche, il Serbsko-dalmatinski magazen, materiâi peâts ae storie dal so antîc clan familiâr, i  Paštrović. Ma si pues dî che la sô vene leterarie e scomence a produsi oparis plui impuartantis tacant dal 1868. Par dîs agns (al murarà ai 11 di Novembar dal 1878) no si stracarà mai di esplorâ i paisuts plui piçui di chê tiere crude e bielonone, domandant ai vecjos che i contassin la lôr culture, la lôr vision dal mont. Di chestis esplorazions a nassaran articui plens di maravee par chê culture ancestrâl che e crodeve inte magjie, inte fuarce dai combatiments pal sanc, pe libertât, pal amôr, che dispès a deventavin baladis e cjants che no si son pierdûts parcè che Stefan Mitrov Ljubiša al à crodût te lôr fuarce identitarie. La storie di Kanjoš Macedonović e je salacor la sô opare mestre. ❚