IL FERÂL. Il Redentôr di Piçûl /

In Novembar tra lis tantis ricorencis si ricuarde ancje la fin de prime, magari cussì no grande, vuere mondiâl. Si dîs concludude cuntune “vitorie”, ma in realtât sierade cun centenârs di miârs di muarts, cun ferîts e distruzions e digraciis di ogni sorte. La Austrie, che e veve dât di lavorâ par secui ai furlans e che cul Friûl e veve simpri mantignût un rapuart, e jere deventade, bot e sclop, nemie patentade al pont di cjalâsi di stos. Ma cuant che si crôt di vê vinçût, si pense ancje di vê reson. Pure retoriche lade indenant par gjenerazions. Par furtune che cumò si fevele di Europe e i confins a son tornâts a spalancâsi.
pre Roman Michelotti
Mi vevin clamât un an a Ravinis, ai 11 di Otubar. A vevin la fieste dal Redentôr, l’aniversâri dal rascjelament di Paulâr e la Madone: trê fiestis intune. Podês dome crodi la emozion di lâ, jo plevan di Rualp, a predicjâ intun Paulâr! Mi jeri preparât benin e o vevi dividude la mê predicje in trê tocs, come che e compuartave la fieste.
Dai trê ponts, o ai batût di plui sul Redentôr, che al sarès une statue che chei di Paulâr a àn metude sù in Piçûl par che ju tegni vuardâts dai Mucs. Al è propit a confin dal Friûl cu la Austrie.
Dopo di vê spiegât cun passion che te vuere si è ducj triscj e no dome i todescs, che salacor a ‘nd jere stâts di nostrans che a vevin dât plui dam di lôr, almancul tes cjanivis e tes stalis, cence contâ i cristians, mi à parût di dî che moments dal gjenar nol jere il câs di sglonfâju tant a sun di bufulis retorichis. Nant dismenteâju o se no ricuardâju par no tornâju a ripeti. E il Signôr al è Signôr di ducj e lui nol à sigûr no metudis stangjis jenfri Paularins e Mucs, che a son confinants e che une vacje e pues passâ di ca o di là cence nancje savê che e à gambiade patrie. Se mai, lis spaltadis lis àn metudis i Talians e la vuere le vin fate no pe nestre patrie, ma pe lôr, che nô o sin in parentât cui Mucs par vie dal Patriarcjât. E alore parcè meti un Signôr propit a confin? Par unî o par dividi? «Jo no ai stât a viodi cheste statue – o continuai – cemût che le vês sistemade, ma però mi fasarès taiâ il cjâf che le vês metude cu la muse che e cjale Paulâr e cul cûl cuintri dai Austriacs. Che se le metevin i Austriacs, le metevin dut ledrôs: la muse viers di lôr e il cûl cuintri di vualtris. Seont vualtris, alore, une robe dal gjenar che si pues girâle e voltâle daûr che al poche, isal un Signôr, che al è pari di ducj, o un pipinot?».
La int e scoltave intente e no mi à semeât che e fos invelegnade. Anzit, mi pareve che e veve capît ce che o intindevi. I unics che no àn capît bocjade a son stâts il bonsignôr di Paulâr, cul muini, che a àn la stesse religjon, e il plevan di Salin. Che di fat mi àn frontât dopo Messe su la puarte de glesie e mi àn dit: «Un predi nol à mai di dî in glesie certis peraulis, che cussì si bute jù la religjon. Par esempli, no tu vevis di doprâ la peraule ‘cûl’!».
«E ce vevio di dî, po?»
«Tu vevis di dî “schene”!».
«Ma jo o crôt che no vedis fat un Signôr cence cûl!».
«Vere – dissal lui -, ma cuant che la int a sint a dî “cûl” e reste cussì imbarlumide e disorientade e scandulizade, che no rive plui a stâ daûrij a la tô predicje».
«Ben se la int e ves il vuestri cjâf!» mi scjampà fûr.
«Se e je cussì, mi displâs ma no pues clamâti plui, che mi tocje di sintîlis a mi dopo!». […] ■
(Gjavât di Misteris Gloriôs)
pre ANTONI BELINE