IL FERÂL. (cuinte pontade) I furlans

O scomencìn chest gnûf an dal “Ferâl”, la rubriche dedicade a pre Antoni Beline, riproponint une sô riflession a pontadis. Il test complet al à il titul “I Furlans e il templi” e al presente un resonament sul rapuart dai Furlans cu la fede e la religjositât.
pre Roman Michelotti
***
(cuinte pontade)
[…] I FURLANS
Identitât dinamiche
Chest mi permet di ameti cence nissun pôre e nissun complès l’esistence di une identitât storiche, culturâl e religjose furlane. Si trate, come che o ài vût mût di dî plui voltis, di une identitât dinamiche e no statiche, in sintonie cul contest dai popui e cui timps che si cjate a vivi. Dut chest mi fâs capî che ancje il Friûl si evolf, si modifiche, al cambie pe leç vitâl de continuitât te diviersitât o de diviersitât te continuitât. Al è ce che al sucêt tal cuarp fisic des personis e dai organisim vivents, che a son simpri chei ma simpri diferents pal fat che lis celulis a cambiin di un continui. Chest al va dit cun clarece soredut a di chei che si ostinin, sperìn in buine fede ma cun pocje inteligjence, a conservâ in maniere ossessive e maniacâl formis lessicâls, mentâls e struturâls muartis e fraidessudis, dant un rimpin propit a chei che a identifichin la difese des culturis minoritariis cuntune batae di retrovuardie e di restaurazion. Volê fermâ la storie, volê tornâ indaûr, volê imponi a la nestre gjenerazion il contest culturâl e lessicâl dai nestris paris e vons al è un at inutil, innaturâl, stupit e mortificant, parcè che nô o vin dirit di vivi il nestri timp come che lôr a àn vivût il lôr. Se la nestre vite e je compagne de lôr, al vûl dî che lôr no àn semenât nuie e nô no vin cjapât sù nuie. Cussì, cul intent di onorâju, si ju disonore. Nô no vin di salvâ nissun. O vin di vivi. No si trate di tignî in vite un passât che nol à plui resons di esisti ma di progjetâ un avignî che nus permeti di vivi in plenece e in dignitât.
Coordenadis storichis…
Il Friûl duncje nol è simpri compagn ma si modifiche cul modificâsi dai timps. Partant il Furlan dal 1500 nol è chel dal 1800 e chel dal 1900 nol è chel dal 2000. E je une regule gjenerâl che no cognòs ecezions, inmò mancul cumò che la comunizazion mediatiche e jentre par dut, nivelant come une staze implacabil. Partant il rapuart che i Furlans dal patriarcjât e de ete moderne a àn vût cul templi nol è siguramentri chel de ete contemporanie e de nestre ete post-moderne e post-cristiane. Parcè che la glesie, come societât e struture, e vîf tal timp e e partecipe di dutis lis modificazions dal timp.
Al è vêr che Diu al à creât l’om sul so stamp, come che nus conferme la Bibie (Gjen 1,26), ma al è ancje vêr che l’om si fâs un Diu o une imagjin di Diu sul propri stamp. E chest stamp si modifiche cul modificâsi de storie. Par chel, in timp di monarchie, di podê espotic e di division di classis, o varìn un Diu alt e trement, un “Re dai rês e Paron dai parons” (Ap 19,16), il Rex tremendae majestatis che si cjantave tal Dies Irae e che te Messe di Requiem di Mozart ti fâs glaçâ il sanc. Un Diu che no si pò fâi domandis e dâi colpis ma dome dâi rispuestis e cirî di parâsi in condizions di evidente e scandalose disparitât.
Se Diu al jere il Suprem e al faseve plui pôre che confidence, il rapuart di sotanance si trasmeteve a dut il mont sacrâl. La pôre di Diu e la pôre dal predi a son su la stesse lungjece di onde, ancje se cun gradazion diferente. Plui alt e lontan e trement al è Diu, e plui fuarte e determinant e sarà la figure dal predi, l’unic in grât di mediâ e di svicinâ chestis dôs realtâts cussì distantis. Cul modificâsi des condizions storichis, politichis e economichis, al è modificât ancje il stamp de nestre vite religjose, pa la cuâl il nestri rapuart cun Diu, se nus è restât un, nol à dibot nuie dal rivuart e de teme dai nestris paris e vons. E, in proporzion, e je calade o sparide ancje la pôre dal predi. ❚
[…]
(al va indevant sul prossim numar)
pre Antoni Beline