Il Domini Coletîf al valorize i trois di Clavaiis e dal Çoncolan

Il Domini Coletîf di Clavaiis al è une realtât un grum ative inte piçule comunitât dal Comun di Davâr, a 827 metris sul nivel dal mâr, poiade tal versant Ovest dal Çoncolan e che i vin za vût mût di cognossi di dongje cualchi timp indaûr (viôt il numar 12 de Patrie dal Dicembar dal 2020).
◆ Pôcs dîs fa si è sierade une iniziative impuartante: il progjet di valorizazion dai trois di Clavaiis e dal versant Sud Ovest dal Çoncolan. Il progjet al è scomençât tal 2020 cu la pulizie dai trois (tancj a jerin stâts ruvinâts de Vaia, des aluvions e ancje des neveadis bondantis). Si è dât dongje un trop di volontaris che a àn lavorât dai 31 di Otubar dal 2020 ai 30 di Mai dal 2021: 17 sabidis e domeniis indulà che a son stâts netâts plui di 15 chilometris di trois! Passât l’Istât, il lavôr al è tornât a tacâ di Atom, fin a rivâ a netâ in totâl plui di 20 chilometris di trois.
◆ La seconde fase dal progjet e previodeve la segnalazion dai trois. In cheste suaze e je jentrade in zûc la associazion culturâl di Clavaiis che e à presentât domande di contribût in Regjon: la domande e je lade a bon fin e a son stâts stanziâts cirche 3.000 euros. La iniziative, di là di valorizâ il teritori, e vûl ancje invidâ il turist a svicinâsi ae culture dal teritori, a scuvierzi memoriis e tradizions. “Un progjet – si lei inte relazion – che al vûl creâ no dome une semplice atrative turistiche, ma che al ponte a riscuvierzi la storie dal teritori, par conservâle e par fâle cognossi il plui pussibil. Di fat, i promotôrs dal progjet a son convints che par incrementâ il turisim inte valade, e in Cjargne in gjenerâl, no coventin grandis infrastruturis e budgets, ma che al basti valorizâ intal mût just il teritori e l’ambient naturâl, che a son il vêr patrimoni di chestis tieris. Passant al pratic, il progjet al previôt:
1. Pulizie dai trois, midiant dal lavôr dai volontaris;
2. Rilevazions GPS e mapadure dai trois, cu la pussibilitât di rindi visibii i percors tes aplicazions dai telefonins; ancje chest par cure dai volontaris;
3. Stampe, su supuarts fats di pueste, di cartei segnaletics e indicazion dai percors plantâts tal teren su pâi di len;
4. Stampe di mapis dal teritori cun evidenziâts i trois, di posizionâ intai lûcs des frazions di Clavaiis e Liariis;
5. Stampe di depliants, di podê pleâ, cu la descrizion dal progjet e cu lis mapis dal pont 4;
6. Instalazion de segnaletiche tai trois, par cure dai volontaris. Il jutori de Regjon al è stât domandât pai ponts 3, 4 e 5.”
◆ A progjet finît, si pues dî che si è tratât di un lavôr grandiôs: plui di 20 chilometris di percors vierts, netâts, ripristinâts e segnalâts cun passe 150 cartei di segnaletiche teritoriâl; 68 zornadis di lavôr dai volontaris par netâ i trois; 5.000 euros i bêçs metûts dal Domini Coletîf di Clavaiis.
◆ Te stagjon estive a pene passade, a son stâts tancj i turiscj, ma ancje i locâi, che a àn provât i percors, scuvierzint un mont che salacor al sarès lât pierdût in maniere definitive tal zîr di pôcs agns.
◆ L’invît al è dal sigûr chel di cjapâsi il timp par lâ a curiosâ il lavôr interessant che al è stât fat, par preseâ – inneantsi tal cidinôr di chescj lûcs – ce che di biel chest teritori cjargnel al pues ancjemò dâ. ❚