Il dificil cunfin tra sigurece e dirits

Inmagât dai computer fintremai di se scuvierte, di piçul, dal Commodore 64, Edward Snowden – cuant che in cjase e je rivade la conession a internet – al passave cussì tant timp su la rêt che la sô famee e à scugnût concordâ cu la companie telefoniche un contrat di pueste par ridusi i coscj. Internet al jere ancjemò sul nassi, une tiere di frontiere batude di pionîrs anonims che a jerin  cetant disponibii a scambiâsi informazions e costruî comunitâts virtuâls che si regolavin di bessolis. Di chest ambient Snowden al à auride la culture libertarie, un fregul “hippy”, che e je tipiche dal zîr dai “hacker”.
◆ Ai 11 di Setembar dal 2001 chel mont al è sparît, adun cu lis libertâts dai citadins, che a son stadis sacrificadis sul altâr de sigurece, intal non de lote cuintri dal terorisim. Chest Edward nol rivave a glotilu e planc a al à madressude la sô decision: deventâ la vôs di sot vie di chel che tal 2013 al è deventât il cussì clamât Datagate, ven a stâi la rivelazion dai programs di intercetazion sistematiche dai dâts dai citadins di bande de NSA (National Security Agency).
La autobiografie romanzade di Snowden i corispuint a voli ae vôs che i à dedicât la Enciclopedie Britaniche, mancul che par un detai. La Britaniche e dîs: «[Snowden] al tacà  cjapâ sù informazions su cualchi ativitât de NSA, plui in particolâr su cierts programs segrets di control che al judicave che a fossin masse grancj par dimension e puartade». Chel ‘al judicave’ al è la mascare tragjiche di Antigone: Snowden di fat al justifiche la sielte di rivelâ la strategjie di control de NSA cu la necessitât di adempî ae leç divine, che e coincît cu la sô interpretazion de Costituzion dai Stâts Unîts (1787), violade de leç dai oms, ven a stâi dal Patriot Act emanât dopo dal maçalizi des Tors Zimulis.
◆ In maniere speculâr la NSA e difint, tant che Creonte, il primât de leç, che e à permetût seont lôr di sventâ 50 atentâts.
◆ Come che al spieghe Massimo Cacciari, te tragjedie di Sofocle la reson no sta de bande di Antigone Intal so «manifestâ une alteritât radicâl rispiet aes sferis de etiche o de politiche». Inte stesse maniere Snowden al pretint une Rêt la che il podê nol puedi impaçâsi.
◆ La reson no sta nancje de bande di Creonte, che nol vûl fâ i conts cul Timp, che al  siôr di dut e nus oblee a riviodi lis nestris decisions in considerazion de evoluzion dai events; cussì a varessin vût di fâ i podês dal Stât agns dopo des Tors Zimulis, dopo des vueris in Afghanistan e in Iraq.
◆ In definitive, ‘Errore di sistema’ (Longanesi) al è un test scorevul e util a capî il nestri timp, ancje se al va let cuntune lint critiche. ❚