Il 2007 dal furlan: un belanç

Ai 30 di Jugn dal 2006 la Zonte regjonâl e nomenave un grup di lavôr cu la incarghe di meti jù une propueste di leç organiche su la lenghe furlane che e les a inzornâ chê regjonâl dal ‘96 e che e proviodès i imprescj par meti in vore chê statâl dal ‘99. In realtât, de nomine dai membris dal grup ae incarghe formâl par podê tacâ i lavôrs a saressin passâts, sù par jù, altris doi mês. A un an di distance, cualis sono stadis lis gnovis plui significativis pal furlan?
Tal zîr di sîs mês, il grup di vore al veve prime metût jù des liniis di indreçament che la Zonte e veve fatis buinis e po, su la fonde di chês, e veve svilupât il test complet de propueste. La Zonte, dut câs, e veve decidût di modificâ il test in maniere cussì pesante che si vevin dai pas indaûr rispiet ae leç 482 dal ‘99 e fintremai ae 15 dal ’96. Cheste decision e veve jevât la proteste de plui part des associazions e des istituzions impegnadis te promozion de lenghe furlane: une proteste che si veve podût scoltâ in maniere clare ancje intant des audizions clamadis dongje de VI Comission dal Consei regjonâl.
APONTAMENT A SETEMBAR_Dongje de propueste di leç rivade de Zonte, la Comission e veve pes mans ancje doi tescj specifics sul insegnament dal e par furlan (un prontât de Comission Obietîfs Didatics de ARLeF e presentât in maniere trasversâl di cuatri conseîrs regjonâi, e un altri fat indenant de Leghe Nord). Po si veve zontade ancje une propueste rivade di Forza Italia. Par cirî di rivâ a di un test unic, la Comission e veve duncje nomenât un Comitât stret che al veve po finît il so lavôr tor dai ultins di Lui. Come test di riferiment e jere stade cjapade la propueste de Zonte, ma intant dai lavôrs, in gracie de pression fate di istituzions e associazions furlanis, diviers articui dal test a son stâts comedâts almancul un pôc. Dut câs, su doi ponts no si à rivât a cjatâ une maiorance dentri dal Comitât: l’ûs dal furlan come lenghe veicolâr te scuele e il teritori là che la leç e larà metude in vore. Cuestions che la Comission al complet e je clamade a frontâ in Setembar.
Propit chestis dôs cuestions (ma ancje altris aspiets, come chel de lenghe standard che la propueste nancje no i faseve riferiment) a son stâts al centri dal dibatit che si à svilupât fûr dal Consei regjonâl. Di fat, une part de stampe locâl, massime chê triestine, e à tacât a soflâ su la cuestion, dant spazi a une schirie di intervents di politics, sindacaliscj, e v.i. che a cjapavin posizion cuintri di ogni tentatîf seri di meti adun une leç di politiche linguistiche pal furlan. Si trate di intervents che dispès a rapresentin un mismàs di lûcs comuns cuintri de lenghe furlane e là che une part dal mont politic dal Friûl VJ no à vût pôre di mostrâ la sô muse plui reazionarie.
IL LEAM CU LA LENGHE_Cheste campagne antifurlane, dut câs, e mostre benon trop lontan che al è dal sintî dai furlans cui che le puarte indenant. Cun di fat, tai studis sociolinguistics fats tai ultins agns, i citadins dal Friûl a àn mostrât di jessi simpri plui leâts ae lôr lenghe proprie. Il dât al è stât marcât inmò une volte di un studi dal CIRF de Universitât dal Friûl presentât in Lui. Inte ricercje, si conferme che la plui part de int (80%) e je a pro dal furlan te scuele, ma soredut che la lenghe e je judicade moderne, buine di esprimi cualsisei argoment e sintude come une ricjece, ancje dai plui zovins.
Che i furlans a vedin simpri plui cussience dal valôr de lôr lenghe, dut câs, si lu à capît ancje in altris ocasions. Par esempli tune cunvigne inmaneade de cooperative Serling in Jugn, là che si à mostrât il valôr che une lenghe minoritarie e pues vê ancje dal pont di viste dal svilup economic e ocupazionâl. Trop che la lenghe e sedi impuartante ancje pai furlans intal forest si lu à viodût, par esempli, inte suaze dal incuintri inmaneât dal Ent Friûl pal Mont ai prins di Avost e te cunvigne metude adun in Mai de Comunitât Culinâr cu la cooperative “Informazion Furlane” su lenghis minoritariis, media e emigrazion.
In sumis, la societât furlane e cjale indenant e tal so avignî e viôt une lenghe furlane plui fuarte, invezit une part de classe dirigjente regjonâl e cjale indaûr cence rindisi cont di trop lontane che e je dal sintî dai furlans e trop lontane che e je di chê Europe che pûr e je simpri pronte a riclamâ a ogni pît alçât.
IN TELEVISION_In Setembar, intant, al è previodût un incuintri in regjon par viodi di tacâ a meti in vore la leç 482 ancje te radiotelevision publiche. Un risultât che al diven de pression continuative metude in cjamp des associazions e des istituzions furlanis, ma che al è dome un prin pas tune bataie che e sarà inmò lungje.