I Trabeat a cjantin la Rivoluzion Rosa: il Friûl che al cjale di là des aparencis

De pedemontane, un contâ dal Friûl e di chês che a son lis veris bielecis, cence sbelets o incuadraduris ritocjadis. Al è jessût Rivoluzion Rosa, il gnûf disc dai Trabeat che, dal 2008, a produsin rock par furlan.
Rivoluzion Rosa al è il tierç disc autoprodosût dal grup formât di Piero Cargnelutti, Luca Lazzarotto, Marco Dell’Asin e Federico Canciani.
Tra cjançons origjinâls, scritis e cjantadis di Piero Cargnelutti, e tocs cjapâts di artiscj plui e mancul cognossûts (tant che Alberto Camerini, The Ramones, Righeira, Flaming Lips e Jake Bugg), lis ghitaris, bas, baterie e vôs dai Trabeat nus contin dal Friûl di ogni dì. Un Friûl che nol à pôre di là cuintri corint.
Come che nus conte Cargnelutti: «Rivoluzion Rosa al è un disc dal e pal Friûl, che pûr jessint un cjanton da la Italie, al vîf in prin plan i mudaments de contemporaneitât: se in Americhe fin a pôcs mês fa si domandavin ce che al varès volût dî vê une presidente femine, nô furlans o podìn dî di vêlu za provât, viodût che o sin aministrâts di une Zonte regjonâl par metât feminine, e o sin tra i prins a vê vude une retore femine. Al è un vant dal sigûr, sinonim di viertidure, ma ancje une disilusion par vie che o vin viodût che nol è che chescj pas indenant che e fâs la societât a vedin scancelât robis tremendis come par esempli la violence su lis feminis. Tal stes mût, la discussion sui gjenars che o vin viodût di pôc tal mont de scuele: di une bande un moment di confront, di chê altre a son vignudis fûr ancje posizions impresentabilis.»

La musiche dai Trabeat e je fate par ridi in compagnie, ma ancje par rifleti di cuistions che a son simpri in prin plan, sedi tal mont no reâl de television, sedi tal cuotidian. Par fâ chest a àn sielzude la musiche rock, che e fronte cun ironie la realtât e e rapresente la rivoluzion ae conformazion, ma a àn ancje sielzût il furlan, la lôr marilenghe, za par so cont espression di tradizion ma ancje di ribelion.
Il titul Rivoluzion rosa al à chê di jessi provocatori. Te suaze dal rock di fat si riferìs a Pink Flag dai Wire, jessût ae fin dai agns ’70. In plui, come che Piero nus spieghe, l’album al interprete lis tematics dal gjenar te societât, cjalant al Friûl come model in Italie.
Ehi Lulù, Andreine, Tu sôs plui fighe di Janis Joplin, a son trê esemplis di tocs che a contin di feminis veris, cuotidianis e che, discrotadis di dut chel marketing e palinsest televisîf e no reâl che o vin di dismenteâ, a tornin a dâ al mont il vêr significât di bielece.
«Se o vessin di sielzi un toc che al sintetize l’album, us disarès Tu sôs plui fighe di Janis Joplin. E je une cjante che semplicementri e dîs che al è biel ce che ti plâs e no ce che a voltis ti fasin crodi. Tai sintiments come te vite. In cheste cjançon e je tante ironie. Une maniere par no dismenteâsi che nol covente lâ par fuarce sui grancj schermis par sei impuartants par cualchidun. Ma al vâl par ducj, al podeve ancje sei Tu sês plui figo di Micheal Jackson…»
Chei altris titui dal album a fevelin za bessôi, cence la musiche: Cuant che ti va ben, No sta fami gole, Che dal formadi, Jo mi visi di te, L’ultime volte, L’estât a sta tornant, Metiti cròt, Nus àn cjolt dut.
Il Cd, regjistrât tal Autun 2016 tra Glemone e Tarcint di Edi Kermit Toffoli e realizât cu la grafiche di Massimo Pix Pittini, al mostre in cuviertine la figure de Rivoluzion Rosa incjarnade di Silvia Alberti. Par podê comprâlu, baste lâ a sintî i Trabeat in conciert o contatâ il grup (mail: Piero Cargenultti piery1978@yahoo.it, pagjine Facebook: Trabeat). ❚
✒ Moira Pezzetta