Ce vuelial dî colâ dentri di un cuadri, esplorâ lis penombris di un afresc,
fâ vivi une statue, sintî ce che nus conte une ancone, une miniature, une stampe? Cheste rubriche e puarte ae scuvierte des oparis di art che e je siore la Patrie,
ma lis conte dal didentri, cu la vôs dai lôr protagoniscj, intun zûc gnûf e intrigant.
Ivan Bidoli al nas a Flumisel. Classe 1933, al à cjapât sù il mistîr daûr dai bancs dal Liceu artistic di Vignesie. Unic arlêf ricognossût dal grant Max Fabiani, al gjolt di grande nomee in dut il mont pe sô vene tant origjinâl e uniche. Al à scomençât tal 1962 cu la sô prime mostre antologjiche inte citât di Grau: di li indenant si è fat cognossi un pôc dapardut, cun sucès di critiche e di estimadôrs, vuadagnantsi une grande fame massime a Tokio, a Barcelone e a New York, e di resint ancje a Cuba e a Miami.
Il pinel par lui al devente un strument par trasformâ il colôr in sugjestion: une musiche colorade che e plasme la materie dal sium intune dimension che e trasforme la
realtât in vision e in poesie. Acrilic e smalt a vegnin spalmâts su la tele a colps di spatule, intune stratificazion buine di zuiâ tra il contrast di plen e di vueit, di penç e di lizêr, a grops, gotis, liniis e taronditâts, là che anime e tiere, sunsûr e pôre, svol e colade a deventin gramatiche di une fantasie cence confins. Il paisaç uman, lis figuris, la nature si confondin intun cjant siamanic e primitîf, bon di contâ chê rapresentazion “polimorfe” de comedie umane che e à il savôr de umiltât e ancje de redenzion. La vene visionarie di chest grant artist e supe linfe intal abìs di une imagjinazion sflandorose, che e torne a sveâ – in chei che a àn il privileç di colâ tal fonts de sô piture – lis sugjestions universâls des flabis e dai mîts plui ancestrâi e fondatîfs: chei archetips che Jung, il grant psicoanalist, al diseve che a fossin scuindûts e platâts tes pleis de nestre anime frutine cuant che si met in scolte dal respîr primitîf dal mont.
Citazions ae grande piture di Gustav Klimt e di Egon Schiele a son sparniçadis in cuasi ducj i siei cuadris, ma il model ispiradôr al reste dome che un pretest par esplorâ trois simpri gnûfs che a puartin in chel bosc naratîf plen di magjie e di maravee là che l’imagjinari coletîf si sfante in chel sogjetîf.
Giulio Regeni, il nestri coragjôs e sfortunât fradi furlan, al steve curant une monografie su di lui.
La opare “Pieri Culon e Maia Cloca” e je stade realizade doprant colôrs acrilics e smalt piturâts su panel. E rapresente une cubie di vecjos contadins, om e femine, che a son daûr a lavorâ intun vignâl. Il titul al è biel che une poesie, tant che al pâr vignût fûr di chê sapience popolâr che e batie ogni cristian cuntun non gustôs e saurît. Lis dôs figuris, dislidrisadis de tiere, a parin nassudis de tiere, fiis de campagne e dal lavôr. Lui dut une grispe, scuindût daûr dai ocjai, jê fate sù intun façoletat e cence dincj. E pûr, il pitôr ju rapresente sul pas di un bal a pîts discolçs, lizêrs e musicâi, e cheste alterazion e creve ogni prospetive razionâl, sprofondant chel che al cjale la sene intune dimension stranide, che e regale cjant e poesie ae forme e al colôr. ❚
Agnul Floramo
