I cent agns di Boris Pahor: a lui i auguris, a noaltris il regâl

Lu vin ricuardât ancje sul numar di Avost de Patrie: ai 26 dal mês passât, il scritôr sloven di Triest Boris Pahor al à fat 100 agns. Aromai cognossût e stimât no dome fûr dai confins talians, al à ricevude ancje la civiche benemerence di bande dal Comun di Triest. Ricognossiment che al veve refudât sot de aministrazion Di Piazza parcè che tal test no jere comprindude une condane dal nazifassisim.
Ma di chês zornadis dulà che Boris Pahor al à ricevût i auguris di plui bandis e la atenzion dai media, al è di segnalâ ancje un regâl che al à volût fânus a nô Furlans.
Intervistât di Luciano Santin pal Messaggero Veneto, a la domande “A proposit de regjon, cemût viodial il Friûl-VJ?” al à rispuindût “Il ricognossiment dal furlan al è stât un grant pas. Ancje se cualchidun ancjemò al sbalie, insistint a considerâ il so idiome un dialet”. Ma si viôt che il gjornalist no si spietave une rispueste di chê fate e al à insistût “O intindevin la entitât Friûl-VJ…”. E Pahor al à continuât “I furlans a son int serie e une vore brave, che no piert timp, e la lôr maniere diferente di cjalâ il mont, rispiet a la medie taliane, si lee a la diviersitât de çocje linguistiche. La colocazion europeane e la sioretât di minorancis a ufrissin a cheste regjon ocasions di vitalitât e benstâ”.
Un regâl che al vâl une vore, no dome pes peraulis di stime, che za nus veve testemoneât za fa cualchi an intune interviste che nus veve concedût.
Ma il valôr di chês peraulis al è soredut tal insegnament e esempli di braure che nus da. Masse dispès, al marche Pahor, a son par prins i Furlans che no si stimin, palesant un sotanisim culturâl une vore pelôs. E che, o zontìn noaltris, cualchi volte al cole intun altri efiet colaterâl: chel de rivalitât cun chês altris minorancis, massime chê slovene. Al è evident che il nivel di ricognossiment e sostegn nol è chel stes, ma pluitost che alimentâ il stereotip ereditât dal Venteni dulà che il Fassisim al concedeve la esistence dal Furlan tant che “sentinele cuintri dal nemì todesc e sclâf”, al sarès il câs di cjapâ esempli e domandâ no di gjavâ a chês altris minorancis, ma bati i pugns e pretindi par nô plui imprescj e rispiet. Ma si sa che se i prins a no rispietâsi o sin noaltris, al è di bant spietâ che a sedin chei altris a fâlu. ❚
✒ Christian Romanini