Pal cuart an di file “La Patrie dal Friûl” e je stade presinte al Salon Internazionâl dal Libri di Turin dal 15 ai 19 di Mai intai spazis dal Lingotto, par chê che e ven calcolade la plui impuartante manifestazion taliane dedicade ae editorie e ae culture.
◆ Intal spazi espositîf rinovât de Regjon Friûl-Vignesie Julie, duncje, a son stadis esponudis lis publicazions de golaine “La machine dal timp”, libris che cui lôr titui a vuelin rapresentâ la atualitât e la vivarosetât de editorie in lenghe furlane. ◆ Cheste presince cun di plui e permet al visitadôr dal Salon di cognossi il valôr dal multilinguisim che al caraterize chestis tieris e il rûl determinant che e à la comunitât furlane inte difese de specialitât e de autonomie de Regjon stesse.
◆ Un invît duncje ae comprension di une storie locâl ignorade a dilunc o fluscade di une vision centraliste dai events che a àn caraterizât i avigniments.
◆ No par câs al centri de atenzion dal public o vin metude la ultime opare publicade de Clape di Culture, chel “Fûc su Gurize” di Ferruccio Tassin e Zuan Nazzi, che al analize il procès di defurlanizazion metût in vore, e ore presint in at, viers di une citât che intune cun Nova Gorica e je vuê capitâl europeane de culture. Propit par cheste valence internazionâl, il libri si presente ancje intune version par inglês “Under fire – Te attack on the Friulian identity of Gorizia” par favorî la difusion ancje a un public forest.
◆ Par marcâ la impuartance di cheste rivisitazion de storie furlane, al è stât ancje un avigniment colaterâl al Salon. Di fat, ae librarie “Trebisonda”, Walter Tomada, Diego Navarria e Marco Stolfo a àn dialogât su “Friulani eretici” dal stes Tomada e, juste apont, su “Fûc su Gurize”.
◆ Tal bancut de “patrie” – come che si pues viodi des fotografiis – a son passâts ospits di gale come il Ministri de Culture talian Alessandro Giuli che al à cjapât su cun curiositât une copie dal gjornâl, ma ancje la campionesse olimpioniche Mara Navarria che e à volût dânus une biele dimostrazion di amicizie, di chês che nus judin a continuâ l’impegn culturâl scomençât di pre Bepo Marchet e Felix Marchi intal 1946 e che al va indenant ancje in dì di vuê. ❚