FEDE E IDENTITÂT CULTURÂL
Une antologjie uniche di 28 composizions cu la partecipazion dal Coro “Rôsas di Mont” de Plêf di Guart
A son tantis lis iniziativis e lis ativitâts che a puartin indenant cun passion e competence, cul desideri di viodi la lenghe e la culture furlane nobilitade, no dome in place (indulà che in vêr al è inmò tant di fâ), ma ancje in glesie. Il grup di Glesie Furlane al fâs chest, par vocazion, fint dai agns ’70, cuant che al è nassût tal contest de cussience autonomiste e daûr dai pas de Teologjie de liberazion tacade di pre Checo Placerean. Une schirie di iniziativis dilunc cuarante e passe agns, votadis a vierzi la cause, stimolâ la cussience, a tegni cont, doprâ e trasmeti la lenghe furlane ancje intal cûr des funzions religjosis. Il grup al à bielzà fat la traduzion in marilenghe de Bibie tal ’97, dal Lezionari tal 2001, e prontât il Messâl Roman, cun tantis azions pal so ricognossiment, e une liste lungje di altris publicazions, mostris, concierts, incuintris di ogni ordin.
Di resint, a àn sburtât fûr, une daspò che altre, trê bielis e impuartantis ideis, deventadis realtât: il libri “50 Corâi de cristianitât todescje voltâts par furlan” (2016), il film documentari “Missus” (2017), produsût de Raja Film, curât e diret dal regjist udinês Massimo Garlatti-Costa, e di pôc il dopli cd “I Recitatîfs Liturgjics”, une antologjie uniche, che e viôt la partecipazion dal Coro “Rôsas di Mont” de Plêf di Guart.
Daûr e dentri di ducj chescj lavôrs, e je la figure e la anime di pre ‘Sef Cjargnel, il predi musicolic disparût in maniere improvise ai 30 di Dicembar dal 2017. Un om che al à dedicât la vite interie, cun semplicitât e no cence profonditât, ae cause furlane in dut il so insiemi.
Cheste ultime racuelte in particolâr, si propon di jessi – come che al scrîf pre ‘Sef, che purtrop nol à podût viodi la publicazion – “un jutori che al cîr di procurâ chei furniments poetics e simbolics che la estetiche e la art a puedin burî fûr, par voluçâ il popul che al celebre, tune atmosfere di contemplazion dal misteri, vierzintlu ai segnâi de Gracie e de udience dal Spirt”. A son protagoniscj i cjants patriarcjins che pre ‘Sef al à cjapât sù tai agns de vive vôs dal popul furlan, studiâts fasint paragon cun altris testemoneancis, altris lezions, fin a rivâ a meti dongje, a meti in notazion, a fâ eseguî e a regjistrâ un bon grup di Salms e Lezions, par un totâl di 28 composizions.
O vin domandât al segretari di Glesie Furlane Christian Romanini cualchi impression sul stât de art des lôr iniziativis. «Se di passe cuarante agns o sin inmò che o scombatìn pe cause e o vin ancjemò di puartâ a cjase la aprovazion dal Messâl Roman voltât par furlan – al dîs -, dal sigûr al è ancjemò tant cefâ. Ma o scugnìn constatâ che, se a nivel popolâr e ancje fûr o ricevìn atestâts di stime e afiet, la jerarchie eclesiastiche locâl e une cierte “inteligentia“, plui che supuartânus, nus sopuartin».
Cuale ise la formule juste di doprâ par tornâ a meti il furlan e la sô int al centri de vite in Friûl? «Al è dibant platâsi daûr di un dêt, ma int tant che pre Renzo Dentesan, ‘Sef Cjargnel, ma o zonti ancje pre Antoni Beline e altris nons tant che pre Checo Placerean, pre Pauli Varut, a jerin fîs di une stagjon che e à parturîts “grancj cjâfs”: la vere e gjenuine classe inteletuâl furlane. Vuê come vuê, se o vin di fevelâ di predis, o vin ancje il probleme che a ‘nd è simpri di mancul, la etât medie dai predis che a son ancjemò in Glesie Furlane e cres simpri di plui. Duncje al è evident che al è une vore plui dificil che a nassin gnûfs pastôrs che a podedin vê ancje chê funzion di inteletuâi organics dentri de societât furlane. Come associazion, o vin il contribût dai laics che a cirin di dâ une man. Al è di sperâ che l’esempli dai “predis iluminâts” al podedi ispirâ i laics e che e sflorissi finalmentri une classe inteletuâl laiche che e vedi a cûr il Friûl, e che e fasedi di “pastôr”».
di Alessio Screm