GLESIE FURLANE: 40 agns di impegn pe lenghe e culture furlane. Tierce pontade

(tierce pontade)
[…] Lis ativitâts de Associazion
Pre Checo al capì che al jere urgjent vê in man i struments necessaris par domandâ ce che di dirit nus spietave e par pretindi pari dignitât. “Un popul cence la Bibie al è come un om cul cjapiel in man” che al domande la caritât.
Lui si metè di buinevoie a tradusi i tescj biblics, a lui po si zontà pre Antoni Beline che i tocjà il compit di completâ il grant lavoron, cul supuart di cualchidun dal nestri grop.
Che la gjerarchie e fos frede e indiferente lu dimostre il fat che la prime edizion de Bibie e fo publicade dal Editôr Ribis che al firmà il contrat cui tradutôrs tal 1979, ma no de Diocesi. Cheste e rivà plui tart tal 1997, come simpri adatantsi a robis fatis. E, co il Stât cu la leç 482 dal 1999 al legjitimà ancje il furlan, si publicà il Lezionari festîf, cu la aprovazion de Congregazion pal Cult de Sante Sede.
Daurman si metè man a la traduzion dal Messâl che al è ancjemò in spiete de aprovazion di bande de CEI.
In chestis iniziativis uficiâls voludis ormai des diocesis dal Friûl, o sin stâts presints e atîfs te comission interdiocesane pe publicazion dai tescj liturgjics. Se al larà a bon fin il Messâl, o varìn di meti man ai Sacraments e Sacramentâi.
Nus pâr impuartant marcâ un sussidi indispensabil che o vin curât pe liturgjie e che e rivuarde il cjant liturgjic. O vin publicât il libri Hosanna, che al à une discrete racuelte di cjants cu la musiche recuperade in buine part des melodiis patriarcjinis. Chestis musichis a àn compagnât par secui lis nestris liturgjiis e a stavin scomparint parcè che mai codificadis, tramandadis di simpri dome oralmenti. Melodiis salvadis in extremis cun tescj trasliterâts po par furlan. O vin di dâ merit a pre Sef Cjargnel, che al à fat tai agns 60-70 dal secul passât un lavôr straordenari di regjistrazion dal vîf. Chestis melodiis liturgjichis no àn nissun savôr di cjançonete, ma a mantegnin une struture e une ande mistiche, contemplative, naturalmetri corâl, puartant a cjantâ spontaneamentri a plui vôs. O pensìn che al sedi stât fat un grant lavôr che al dà, o al varès de dâ, plui dignitât a lis nestris celebrazions. Magari cussì no ancje la liturgjie culì in Friûl e je ormai invadude di une fulugne di cjants masse dispès puars e banâi tant pe musiche che pes peraulis. E no lu disìn dome nô! Inveziti nestris tesaurs, lis nestris perlis lis vin butadis in bande e sbeleadis. Pecjât!
Dongje di chescj impegns grancj pe fadie e pal timp che a àn domandât e pal valôr impuartant che a compuartin, Glesie Furlane in chescj agns e à ancje publicât passe 100 titui di libris cuasi ducj par furlan e, in diviersis ocasions e à elaborât une vincjine di documents.
Altris informazions si puedin cjatâ sul sît www.glesiefurlane.org. Decisive e je stade la nestre colaborazion cu la ARLEF tal 2011 pe leture continuade de Bibie. […] ❚ (al va indevant)
pre Roman Michelot