Giovanni Pillinini, “L’orloi dei vite”, Udin, 1982

“No tal caratar, ma tal mût di vivi, di un pôc in cà, Saveri al jere cambiât. Un grum di pizzulis robis, che une volte no lu varessin interessât, cumò i pareve ch’a’ vessin une grande impuartanze. A chês grandis, come il lavôr, la cariere, la nomèe, nol faseve quasi plui câs”.
Cussì e scomence la conte Une grampe di vite, la prime des undis che i dan vite a chest libri di 127 pagjinis, editât de Filologjiche za fa trente agns. La prime, la plui lungje e je un piçule opare mestre. E trate un argoment che al jere dificil di spietâsi in chei agns. Vâl a dî la sessualitât. Ce maniere che la sessualitât, vivude cence pôris e ancje cence i tancj berdeis che la educazion catoliche dispès e meteve par traviers, e pues judâ une copie a cjapâ cussience di se, de vite, dai rapuarts. E la tratazion e je esplicite, clare, no lasse nissun aspiet intal grîs di peraulis no ditis. E esplicite e je ancje la analisi dai scrupui e des conturbiis dal predi che al ven inviestît di cheste problematiche. «Se i fruz si fasessin pocant un boton, nol nassares plui nissun», i dîs a la femine, in confession. Ma cuant che al vierç la biblie per cjatâ un confuart ai siei dubits, il voli i cole propi sul Cjant dai cjants: duo ubera tua…e vie a cirî alegoriis, significâts scuindûts, cuant che invezit, duo ubera tua a son propi i doi sens di une femine. Il misteri de vite, in fonts, al è cussì sempliç!
Il teme de sessualitât si lee cuntun altri argoment une vore presint intes contis, chel de vuere. In Bombardament e je la vision des cuessis di une zovine a fâi passâ la pôre a di un soldât sot des bombis. In Un cjaldîr plen di aghe un pari i racomande al fì che al partìs in vuere di stâ atent ancje a lis feminis («di no tirâsi dongje qualchi malatie…»); ma il fì al tornarà dome la gnot dai muarts a bevi intal cjaldîr che sô mari i veve prontât.
Une condane radicâl de vuere si le cjate in “O mi clami Toni Megot”, dulà che un om che la vuere le à provade su la sô piel, al fâs un resonament cussì sempliç e cussì clâr che al ven di dâsi di maravee che ancjemò al sedi cualchidun che al puedi difindi la idee stesse di vuere, «un discors fra cjocs», nuie di plui e nuie di mancul.
Nol mi risulte che Pillinini al vedi scrit altri di narative di li indenant (al è un storic di valôr): se lis premessis a jerin chestis, al vares podût dânus bielis provis!. ■
Laurin Zuan Nardin