Il furlan, che al à zuiât par plui di vincj agns
a nivel internazionâl e che cumò al è dirigjent sportîf, al fâs fieste pal so mieç secul
Giacomo Galanda, clamât di ducj “Gek”, al è stât un dai plui fuarts zuiadôrs di bale tal zei in Italie. Al à vinçût une vore, al à vistût maiutis preseadis in Italie, al è stât cjapitani de Nazionâl taliane plui fuarte dai ultins trente agns. E al è cognossût par jessi un sportîf a 360 grâts, dirigjent, organizadôr di events, massime pai plui zovins. E, intai ultins mês, ancje scritôr, cul libri “La mia vita a spicchi”, indulà che al conte la sô vite. Cuntun biel sottitul: “Chê diference fine fra jessi e vê”.
Un libri scrit pai 50 agns di Galanda: une ocasion par contâsi…
_
Gek, passâts i cincuante, cjalant indaûr, ce si viodie in dut ce che tu âs fat, tal sport e inte vite?
“Mi plâs fevelâ di trê valôrs che o ai cirût di puartâ simpri indenant, come colonis. A son la base di partence intes relazions, sedi cu la int che mi sta plui dongje, sedi cun ducj chei che o ai incrosât tal sport. Dibot come i fondamentâi di tecniche che un zuiadôr al scuen vê par zuiâ. L’impegn, la famee e il divertiment”.
_
Scomencìn dal valôr dal impegn.
“Une peraule impuartante. E pant la scugne di cjalâ drete la dificoltât, tignint iniment che un obietîf fissât al dipent simpri di un impegn cjapât. Ven a stâi che al bisugne mantignîlu e, in situazions dal gjenar, si impare simpri alc. Une mentalitât une vore furlane: o vin simpri di puartâ insom un lavôr e o stin culì fintremai che nol è sierât”.
_
La famee?
“La mê mi à passât il sens di apartignince e la volontât di meti sù alc par ce che al vignarà. E mi à insegnât di fâ cussì no dome par me: si scuen fâ cussì ancje pe clape di personis plui largje, amîs e familiârs. Di bessôi si rive dome a dâ une direzion, dut câs di bessôl no tu vâs di nissune bande. Inte mê cariere o ai imparât che par rivâ al grant risultât e covente la condivision”.
_
Ce intindistu par divertiment?
“Une robe particolâr. O ai vude la fortune di vivi fasint une des robis plui bielis: zuiâ a bale tal zei. E je vere che o ai sacrificât une vore di altris robis, dut câs o ai fat ce che mi plaseve. E o ai di vê agrât a tancj di chei che a jerin ator di me, parcè che o ai tirât dongje gjonde, bêçs e cetant divertiment. Il biel al è stât rivâ a pariâ lis robis e a belançâ in maniere juste lis dificoltâts cul divertiment”.
_
Cualchi figure che ti à sburtât e, massime, di cualchidun che a ti à angariât?
“Ducj a son stâts un element di stombli. O ai di ringraciâ une vore di personis par chel che mi àn dât inte mê cariere, di zovin, fin ai ultins agns. O ai imparât a jessi resilient, o ai resistût a situazions complicadis. Cuant che o jeri zovin, tal liceu a Udin, un professôr di filosofie no mi dave mai un vôt positîf, ancje se o studiavi ben e o jeri preparât, parcè che o zuiavi di bale tal zei e, tal so cjâf, o vevi di sielzi: studiâ o zuiâ. O soi content dal gno percors di student, cun dut che no ai finît le universitât. O soi convint che la scuele e à di vierzisi a materiis gnovis, par dâ a ducj la pussibilitât di cjatâ la strade juste”.
_
Un alenadôr che ti à imbrenât?
“Pero Skansi, ai timps de Fortitudo di Bologne: al diseve che jo no jeri un zuiadôr di serie A. Lu ai simpri rispietât; e jere une sô convinzion, dut câs mi à motivât une vore…”
__
La tô leande cun il Friûl?
“Il puest indulà che dut al è scomençât e indulà che o torni par fâ la fieste dai miei cincuante agns. O ai clamât achì ducj chei che a podevin jessi. Tantis voltis, lant ator pal mont, o ai fevelât de mê Patrie furlane, des nestris tradizions, de nestre cusine. Di bot, in Emilie ducj a tirin pe taiadee, di altris bandis pe paste a la carbonara, a son miârs di ricetis dapardut, e jo o dîs simpri… “fantats, o soi furlan!” Baste fâ 5 chilometris di ca e di là pal Friûl e cognossi un mût di fâ lis robis di no crodi! Il frico, la broade… Di piçul o lavi tal ort de mê none a tirâ sù i sparcs. Vêso idee di trop bogns che a son?” ❚
:::::::::::::::::::::::::::::::::::::::::::::::::::::::::::::::::::::::::::::::::
Cjapitani de Nazionâl taliane, medaie diarint a Atene 2024
Giacomo Galanda al è nassût a Udin ai 30 di Zenâr dal 1975. Al è alt 2.10 metris e al zuiave come “ale fuarte”. Al à tacât cu la Ubc Legno Nord di Udin, cun alenadôr Alberto Martelossi e, cuant che al veve 16 agns, al è stât in Americhe par studiâ e zuiâ ae Pocahontas High School, intal Iowa. Doi agns daspò al è tornât in Italie: Verone, Fortitudo Bologna, Varese, Siena, Milano e Pistoia lis scuadris, in vincj agns di cariere. Cu la Nazionâl taliane al à vinçût la medaie di arint aes Olimpiadis di Atene 2004, l’aur ai Europeans di Parîs tal 1999, l’arint in Spagne intal 1997 e il bronç in Svezie tal 2003.
◆ Trê i scudets: a Varese intal 1999, a Bologne intal 2000 e a Siene intal 2004. Cun di plui, une Cope Italie, dôs super copis talianis, dôi campionâts di serie A2.
◆ Dome in serie A al à metût adun cuasi cinc mil ponts. Cun la Nazionâl taliane al à zuiât 215 partidis, segnant 1440 ponts.
◆ Risultâts che a fasin di Gek un dai plui fuarts e titulâts zuiadôrs talians. Par sigûr, al è il plui fuart furlan di simpri, cul massim rispiet par altris come Cescutti e Savio. Dopo des Olimpiadis dal 2004, cuant che al jere cjapitani de Nazionâl, al è stât decorât come Uficiâl al Ordin al Merit de Republiche taliane. ❚
:::::::::::::::::::::::::::::::::::::::::::::::::::::::::::::::::::::::::::::::::
“La mia vita a spicchi”, lis jentradis dal libri a van in beneficence
“Un regâl par me, par tornâ indaûr a dut ce che o ai fat tai prins cincuante agns, vint tal cjâf i amîs dal Dynamo Camp”. Giacomo Galanda al spieghe cussì la decision di scrivi la sô autobiografie. “Cuant che o ai tacât a scrivi, o ai subit pensât di fâ fieste cui amîs di simpri, a Udin, inte mê citât, indulà che o soi nassût, cu la int che e jere cun me cuant che o jeri frutut e zovin e cu lis personis che a àn cjaminât cun me, no dome intal sport. Mi plâs une vore la idee di jessi une sorte di coletôr di personis, che a vedin la sodisfazion di cjatâsi e fâ une fieste e vivi il presint, no par ricuardâ ce che al è stât in passât. Se no, si cjatìn dome ai funerâls”.
◆ Lis jentradis de vendite dal libri a laran ae organizazion dal Dynamo Camp di Pistoie, in Toscane: une struture che e ufrìs, a gratis, programs di terapie ricreative ai minôrs cun malatiis griviis o cronichis, disordins dal neurodisvilup o disabilitâts. ❚