Furlans cuintri de crisi: Paolo Marcuzzi, de finance a ristorazion

Ae fin si trate simpri di fâ conts, ma se prime il “menù” al rivuardave titui, azions e altris operazions finanziariis, cumò si fevele di prodots dal teritori che a deventin plats de tradizion furlane.
Cussì Paolo Marcuzzi, 50 agns di fâ a Otubar, za di doi agns al à lassât il marcjât de finance par rivoluzionâ la sô vite e cjapâ sù doi ambients pontant su la ristorazion.
“Jo e la mê famee o vin provât za l’an passât cjapant sù il ‘Chiosco Marchesin’ di Palme e no je lade mâl: o sin chei dai ‘calamârs’ su la strade par Grau” nus conte Paolo “ma chê e je une ativitât stagjonâl che o tornarìn a vierzi cuant che al tornarà cliput. O cirivin un ambient di tignî viert dut l’an e no dome di Istât. E cussì cuant che e je rivade la ocasion di Osôf cu la tratorie ‘Li di Min’ no me soi fate scjampâ e cumò al è za cualchi mês che o sin ca”.
Ma nol è stât facil “la crisi e continue a muardi, ma cu la nestre ufierte o rivìn a dâ alc di nostran e che al rint”. Parcè che Paolo e la famee a àn pontât une vore sui plats de tradizion propit par dâ un leam cul teritori e distinguisi cu la tipicitât. “O cirìn ancje di leâ i events ae stagjon e juste cualchi setemane indaûr o vin proponude la serade dai ‘vues di purcit’ che e à vût un bon riscuintri di bande de int, ma no si limitìn al mangjâ e bevi”.
Paolo al à tal cûr il Friûl e la uniche bandiere che al à picjade fûr sul plaçâl e je chê dal Patriarcje Bertrant “Tal gno ambient o puarti ancje spont par leturis e la Patrie dal Friûl no mancje mai: o soi stât une vore braurôs che propit tal aniversari dal Riviel contadin dai 1511, ai 27 di Fevrâr passât o sês vignûts a presentâ la riviste propit ca di me parcè che o ai voie che chest ambient al deventi un riferiment par cui che al à a cûr la nestre identitât”.
Par contats o informazions si pues ancje viodi la pagjine Facebook. ❚
✒ Redazion