Fruts cressûts a pan e… Gnognos!

I Gnognosaurs a àn pardabon rot i cits! Di cuant che a son comparîts, tai prins agns dal ’90, a son sù par jù 20 agns che nus tontonin in dutis lis manieris. Cui lôr albums, su la stampe periodiche e cumò ancje chê cuotidiane, in publicazions di pueste che si scugne metisi lì a jemplâ di colôrs e altris dulà che a volaressin par fin insegnâti cemût che tu âs di lâ in biciclete! E po mi àn jemplade la machine e lis puartis di cjase cui lôr adesîfs, e ancje su Facebook no ti lassin in pâs. E ce pâr…!
Il risultât par esempli al è che mê fie, vignude sù cui Gnognosaurs tal mieç dai pîts, e che prime mi deve dal ‘Homer Simpson’ cumò par fâmi tasê mi dîs: “Ma sêstu come Rugne”?
Il parcè al è clâr: cuant che un imprest come un fumut al compagne la cressite di une gjenerazion al devente un strument straordenari di promozion di une lenghe parcè che al jentre tal imagjinari individuâl e coletîf, ma ancje strument di alfabetizazion parcè che al ven doprât.
I Gnognosaurs a son popolârs, lis lôr storiis a son divertentis, si lis gjolt intun moment parcè che a durin pôc, juste une striche, ognidun al pues identificâ se stes o chei altris cun cualchidun di chest troput di erois imbranâts, parcè che il fumut al è cussì, une storie contade dome a ti ma che tu puedis condividi cun altris, ma al pues ancje coventâ par tignî i grancj a la largje.
Mancjarès dome che a rivassin in television e che cussì a tacassin a movisi e a fâ sintî la lôr vôs. No si rivarès plui a parâsi… ❚
Pauli Cantarut